Los retayos n’Educación tienen consecuencies graves

¿Tien la culpa’l profesoráu?

Nos últimos tiempos surdieron en diferentes medios de comunicación delles opiniones y propuestes pal mundu educativu. Curiosamente, los diferentes plantegamientos punxeron l’atención nel profesoráu, dexando fuera del análisis los problemes reales que manquen la enseñanza pública.

El mundu de la enseñanza, sobre manera nel tarrén de la educación pública, pasó nel últimes llexislatures, y sobre too na que ta acabando agora, per un auténticu ataque que lu dexó desfechu. Los retayos, principalmente los dictaos pol Real Decretu Llei 14/2012, de midíes urxentes de racionalización del gastu públicu nel ámbitu educativu, dexaron baldada la educación pública. Retayos tan significativos como l’aumentu de les ratios d’alumnáu por aula, la supresión d’unidaes escolares, la conxelación de les ufiertes d’emplegu, l’abandonu de l’atención a la diversidá (alumnáu con dificultaes especiales), l’amenorgamientu de les partíes pa beques, l’aumentu de les tases universitaries, la mengua de les plantiyes docentes cola destrucción de miles de puestos de trabayu, disminución de recursos a los centros educativos, l’incrementu de la carga horaria y la degradación de les condiciones llaborales del profesoráu, etc., van torgando la educación pública d’una forma alarmante. Uuna riestra de retayos que repercutieron nes condiciones de trabayu del profesoráu, y tamién nos intereses del alumnáu y les families, que vieron yá como-yos quitaben derechos. Tou esti retrocesu nun se pue xustificar con argumentos economicistes namás,, sinon que respuenden a un plan de degradación diseñáu a conciencia pa potenciar la privatización y beneficiar a les élites cola sumisión de la comunidá educativa. Nun vamos cansar de dicir, como llevamos diciendo siempre, que la educación ye un derechu fundamental ya inalienable de les persones y non una mercancía o serviciu mandáu poles regles del mercáu.

Énte estas elecciones que vienen, l’análisis fundamental que dende los partíos s’habría de facer de la educación tien que tar enfocáu principalmente nos efectos provocaos por tola política de retayos de los últimos años y la forma de da-yos vuelta. Pa ello, tendría que se revocar el compromiso de reducción del PIB en materia d’educación comprometíu énte Bruseles, que ye del 3.7%, y xubilu hasta’l 7 %. Plantegar, como diz el señor José Antonio Marina, que’l problema del enseñu ta nel profesoráu, ye esmucise de la responsabilidá y disviar l’ atención de forma intencionada.

Tamos nun momentu nel que ye precisoa dexar a les clares que, gracies a la profesionalidá del profesoráu, ala so dedicación, el so compromisu y perseverancia, l’enseñu públicu resistió y agunató tolos ataques nos que tuvo envuelta nos últimos tiempos. Ensin embargu, el nuevu ministru d’Educación, escapando de la responsabilidá del gobiernu nel dañu a la enseñanza pública como consecuencia de los munchos retayos, sigue la llinia del so predecesor cola demonización del profesoráu pentemedies de la elaboración d’un supuestu Llibro Blancu, que-y tienen encargao al señor Marina y que tien recetes vieyes y neolliberales, como la introducción del pagu al profesoráu en función de los sos méritos y resultaos. Trátase d’una concepción mercantilista y arbitraria de la función docente que ta lloñe del fomentu del trabayu n’equipu y que quier tapar los retayos y los despidos de miles de docentes interinos poniendo enriba la mesa soluciones demagóxiques como les evaluaciones que-y echen la culpa al profesoráu de los problemes que sufre nestos momentos la educación.

Les próximes elecciones xenerales tienen que valir para pagar les cuentes. Na historia recién, la comunidá educativa y la sociedá en xeneral llevantaron la voz como nunca lo fixeron reclamando la educación que merecemos: una educación pública de calidá, gratuita, democrática y participativa, inclusiva, laica y respetuosa coles diversidaes. SUATEA y la Confederación de STEs-intersindical demanden a los partíos políticos que concurren a esti comiciu que’l cambiu educativu tien que ser inescusable cola nueva llexislatura. La retirada de los retayos, la derogación de la LOMCE y la reforma universitaria del ministro Wert son inaplazables.

Uviéu, 23 d’ochobre de 2015