L’informe Pisa y los presupuestos d’ASTURIES

COINCIDIENDO COL INFORME PISA, SUATEA PRESENTA NEL  PLENU DE LA XUNTA XENERAL DEL PRINCIPÁU PROPUESTES EN MATERIA EDUCATIVO A LOS  PRESUPUESTOS D’ASTURIES

De primeres, dende SUATEA, queremos incidir en qu’hai que relativizar la importancia del informe internacional PISA, unu más sobre educación, que reflexa aspeutos parciales y reduccionistes y qu’establez un ranking ensin esplicar los condicionantes qu’arrodien el procesu educativu. Esti modelu d’evaluación y la so formulación, lleváu a cabu pola OCDE, consiste nuna prueba que namá valora la calidá de los sistemes educativos en función de los valores cuantitativos y, en concencia, nun val n’absoluto pa midir la calidá real de la educación d’un país.

Sía que non, estes resultancies, anque parciales y sesgaes, confirmen polo xeneral que’l sistema educativu funciona y que’l profesoráu cumple bien col so llabor, anque a les condiciones en qu’ésti desempeña’l so cometíu falta-yos enforma pa ser les meyores. Tenemos que recordar el calquier que supunxeron pal sistema educativu los retayos qu’impunxo’l gobiernu y Rajoy col Real Decretu 14/12 de racionalización  del gastu educativu de 2012, que supunxo una medría del horariu llectivu al profesoráu y  la medría de ratios d’alumnáu per aula, que les sos consecuencies fueron l’amenorgamientu de les plantiyes, col despidu de miles de docentes, y l’empeoramientu  de l’atención educativa que s’ufierta al alumnáu. Pero’l profesoráu, entá en tan males condiciones, actuó siempres con responsabilidá y profesionalidá.

Recordamos que, anque España ye la octava potencia económica del mundu, namá destina’l 4,7% del PIB a educación, cuando la media de los países de la nuesa redolada ye del 5,8%. Por tanto, ye necesariu algamar el 7% na llexislatura, pues namá d’esta manera podrá amenorgase el númberu d’alumnos/as por aula; aumentar les plantiyes de profesoráu y  contratar trabayadores sociales; ameyorar la formación del profesoráu n’aspeutos como prevención y resolvimientu de conflictos; y potenciar l’autonomía pedagóxica de los centros.

Tocantes a Asturies, les resultancies d’esti Informe PISA paez que confirmen un pequeñu recule en comparanza col Informe de 2012. Queremos recordar que los retayos en materia educativo fueron dramáticos n’Asturies. La implantación n’Asturies del Real Decretu 14/2012 tocántenes a la medría del horariu llectivu en dos hores foi amolador porque l’Alministración asturiana fixo la peor llectura posible y el profesoráu asturianu de Secundaria, Formación Profesional y otres enseñances de Réxime especial sufre la mayor carga lectiva y non lectiva de tol Estáu.

Ye entós el momentu de llevar a cabu una política decidida de sofitu a la Educación Pública n’Asturies, con una medría del gastu en materia d’educación qu’influya nuna meyora de la calidá educativa.

Pa too ello, precisamente güei, SUATEA compareció na Xunta xeneral del Principáu nel alderique sobre los presupuestos, llevando aportaciones y propuestes en materia educativo. Propunximos que se lleven a cabu unos presupuestos con una visión integral, que contemplen tanto ameyorar el sistema educativu públicu asturianu como potenciar el papel dinamizador qu’ésti xuega nel caltenimientu de los habitantes de les zones rurales y na creación d’empléu.

Pa too ello, vamos facer les siguientes propuestes:

1. En primer llugar y nel marcu del recule de los retayos derivaos del Decretu 14/2012, proponemos l’amenorgamientu de les dos hores lectives y de les hores complementaries que fueron amontaes n’Asturies pal profesoráu de Secundaria, FP y otres enseñances de Réxime especial. Amás, propónse la dotación de profesoráu tutor en toles aules de Primaria.
2. L’inmediatu desenvolvimientu del artículu 105 de la LOE, que trata, ente otres cuestiones, el cambéu de la xornada pal profesoráu mayor de 55 años.
3. Contratación de profesoráu interino, con garantía d’estabilidá, y la convocatoria d’empléu públicu. Los centros educativos non yá nun tienen de sufrir amenorga de plantiya, sinón que se deben amontar al traviés de la creación d’empléu pa garantizar una fayadiza atención educativa al alumnáu.
4. D’últimes, contemplar que los centros educativos sían espacios nos que la participación de profesionales non docentes xuegue un papel fundamental na atención a la diversidá. Tien de buscase, non solo atender a les necesidaes específiques del alumnáu, sinón tamién garantizar les contrataciones nes que se lleva a cabu el so llabor cola perspectiva d’estabilidá y non la precariedá que se propón na actualidá.El secretariáu de SUATEA

   Uviéu 7 d’avientu de 2016