Les perres públiques, pa la pública

SUATEA REFUGA QUE SE SIGA FINANCIANDO A EMPRESAS PRIVAES DE LA EDUCACIÓN CON DINERU PÚBLICU

Dende SUATEA espresamos el nuesu refugu absolutu al entamu de nueves negociaciones ente’l Gobiernu del Principáu d’Asturies y les patronales de la enseñanza concertada, orientaes a siguir destinando recursos públicos a meyorar les condiciones d’un sector que nun forma parte de la rede pública d’educación.

N’un momentu nel que la escuela pública asturiana sufre recortes, zarru d’unidaes y una falta estructural d’inversión, resulta inconcebible que el que se autodefine como el gobiernu más progresista de la hestoria d’Asturies siga reforzando un modelu educativu basáu n’empreses privaes subvencionaes, munches de les cualos responden a intereses elitistes, segregadores y escludientes. Mientres se conxelen o recorten recursos pa la rede pública, destínense más de 107,7 millones d’euros nesti exerciciu pa financiar una rede paralela, innecesaria y clasista, la esistencia de la cual ta más que cuestionada.

Dende SUATEA nun nos oponemos a que’l personal de la rede concertada meyore les sos condiciones llaborales, pero lo que nun aceptamos ye que eses meyores se financien con dineru públicu, detraíu direutamente de los fondos que deberían destinarse dafechu a fortalecer la escuela pública. Quienes tienen de pagar eses meyores son les sos propies patronales y les families que escueyen esti modelu, non el conxuntu de la ciudadanía asturiana al traviés de los presupuestos xenerales.

La educación concertada representa una opción privada pa una minoría, caltenida colos impuestos de tolos y toes. Como amuesen los estudios elaboraos por SUATEA cada añu, nun esiste dengún problema oxetivu de ratios nin d’espacios que xustifique la so esistencia. Lo que hai ye una voluntá consciente de caltener un modelu educativu que seleiciona, segrega y esclúi, munches veces por razones sociales, económiques y ideolóxiques. Hai quien quier pa los sos fíos y fíes un modelu d’educación diferenciada, escludiente y socialmente homoxéneu, pero nun quier asumir el costu que ello implica: pretende que lo paguemos tolos y toes colos nuesos impuestos.

Dende SUATEA dicímoslo ensin ambigüedá: nun se pue defender la escuela pública ensin cuestionar la esistencia y financiación de la concertada. Nun caben modelos intermedios. Nun caben equilibrios falsos. O se defiende un sistema públicu, laicu, universal y de baldre, o se sigue alimentando con dineru públicu negocios privados que perpetúen la desigualdá.

Somos trabayadores y trabayadores de la educación pública. Defendémosla porque ye la única capaz de garantizar la equidá, la cohesión social y el derechu a una educación n’igualdá de condiciones. La concertada ye dafechu prescindible. Y si daquién quier una educación segregadora o elitista, que la pague.

Nun aceptamos nin aceptaremos que se sigan destinando fondos públicos pa caltener y meyorar un modelu educativu priváu. Nun ye una cuestión de calendariu, sinón de principios: nin n’iviernu, nin n’agostu, nin nunca tien de utilizase’l dineru de tolos y toes pa financiar intereses particulares y modelos escludientes. Cada euro que se desvia a la concertada ye un euro que se-y niega a la escuela pública y al derechu a una educación verdaderamente igualitaria. Esiximos el fin inmediatu d’esta deriva y una apuesta clara, decidida y ensin matices pola educación pública asturiana.