Les empreses van a formar emplegaos, non a educar persones

Na xornada informativa celebrada ayeri pela mañana sobre’l nuevu modelu de Formación Profesional, la Conseyería de Ciencia, Innovación y Universidá espunxo la importancia de la participación ya implicación de les empreses pal ésitu de la futura FP, xunto a una representación, mayoritariamente masculina, del alumnáu, el profesoráu de FP y les empreses collaboradores. Too paez indicar que tamos ante un nuevu nichu de mercáu. 

Dende SUATEA y la Confederación de STEs amosémonos en repitíes ocasiones bien críticos con esta llei, yá dende los primeros borradores, daes les implicaciones negatives que tendría pal personal docente y pa la formación del alumnáu.

La nueva FP merma’l papel del profesoráu, yá que tresllada les sos funciones a los/les trabayadores de les empreses, dende agora corresponsables de la formación del alumnáu, pero a los que nun se pide titulación nin capacitación metodolóxica dalguna. El profesoráu, suponemos, va ver aumentada la so carga de xestión al empar que se-y amenorga la carga docente. Y too esto cola sida d’un aumentu de la empleabilidá que tampoco nun se concretó  pa nada ayeri. 

Amás, la nueva Llei de FP nun crea nueves places públiques presenciales, sinón que dexa que centros privaos realicen una “ufierta sostenida con fondos públicos“, dando tou tipu de facilidaes pa qu’impartan FP online. Trátase de “conciertos” onde organismos empresariales de too tipu van executar enseñances de FP con financiamientu públicu.

Magar hai aspeutos de la propuesta que nos resulten positivos, como la necesidá de comunicación constante ente centros educativos y empreses, o de que sía la empresa la qu’apurra ciertu sentíu prácticu y actualización tecnolóxica a les competencies curriculares adquiríes nel centru educativu, paez que’l Gobiernu asturianu pretende que faigamos un actu de fe en relación a los supuestos beneficios del modelu dual colos yá habituales argumentos de que “en centroeuropa ye lo que funciona”. Y poco más.

A última hora, la privatización ye la gran ganadora d’esta nueva Llei de FP, y tanto la formación metodolóxica como la esperiencia docente del profesoráu van ver amenorgada la so importancia de manera drástica nesta etapa .