SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
La primer ufierta de places d’interinidá que la Conseyería d’Educación sacó pal cursu 2021-2022 xube a 2908 vacantes y sustituciones, de les que 1118 son a media xornada (38,4%). La convocatoria ye paecía a la del cursu pasáu en que se convocaron unes trés mil. Nel global d’esti cursu hai que restar 529 places que foron cubiertes poles persones que superaron los procesos selectivos y sumar les resultantes de xubilaciones, que namás nel 2020 xubieron a 430.
Nun s’especifica na convocatoria qué places de les ufiertaes correspuenden a les 392 estraordinaries anunciaes apocayá pola Conseyera nueva pa refuerzos y atención a la diversidá de resultes de la COVID-19, pero nun nos salen les cuentes. La vuelta a les ratios d’enantes de la pandemia supón claramente un amenorgamientu de contratación de profesoráu: a menos grupos d’alumnáu, menos profesoráu p’atendelos.
En Secundaria ufierten un total 1615 places; en Primaria, 1443; en Formación Profesional, 247; n’Escueles Oficiales d’Idiomes, 49; n’Artes Escéniques, 42. Les places a media xornada son 591 en Secundaria, FP, EOI, Escueles d’Artes, etc.; y 527 en Primaria y Educación Infantil. La suma llévanos a un 38,4%, un altísimu porcentaxe de places a media xornada que dexa nidio otra vuelta más que’l profesoráu interín asturianu ta espuestu a la precariedá: empléu con salarios de mileuristes que nun lleguen pa gastos de desplazamientu, agospiamientu y mantención fuera casa. Por esa razón, ye previsible que na axudicación de places que va tener llugar la próxima selmana van resultar ermes dalgunes d’elles.
Esmoleznos abondo que nun s’incluya na oferta denguna plaza vacante de Conservatoriu, esti fechu ye abondo dañible pal personal aspirante teniendo en cuenta que son persones que tán, en munchos casos, en llistes de delles especialidaes y Cuerpos docentes, si ye un erru, la Conseyería debería igualo darréu.
Per otra parte, queremos denunciar la forma de xestionar el calendariu d’actuaciones, les convocatories y los plazos per parte de la Conseyería. Nun ye de recibu que les axudicaciones de los destinos s’espublicen el próximu 31 d’agostu y que’l profesoráu tenga d’allegase al so centru de destín a otru día, 1 de setiembre, colos problemes ya inconvenientes de desplazamientu y agospiamientu que supón.
Uviéu, 24 d’agostu de 2021
Esta entrada está disponible en: Castellano (Castellanu)
