L’engañu de la xuba la paga

Nel mes d’ochobre aplicósemos con calter retroactivu a 1 de xineru de 2023 un aumentu de la paga del 0.5%. Débese a los alcuerdos salariales soscritos el pasáu 3 d’ochobre de 2023 ente los sindicatos CCOO y UGT col Gobiernu pal periodu 2022 a 2024. Nellos apáutase una xuba fixa pa esi intervalu de tres años del 6% y un 1.5% adicional condicionáu a la variación del PIB y el IPC. Nel meyor de los casos prevese una medría del 7.5% de los nuestros sueldos nesi periodu.

Pa damos cuenta de cómo varió’l nuestru poder adquisitivu en comparanza col que teníemos nel añu 2010, tenemos que tener en cuenta que dende esi añu hasta’l 2018 la perda acumulada yera d’un 15% aproximao como consecuencia de los recortes salariales producíos depués de la llamada crisis económica de 2008. Poro, pal añu 2024 nel que finen los alcuerdos y teniendo en cuenta que la previsión del IPC añal pal 2024 ye del 4,3%, la perda del nuestru poder adquisitivu va ser de 15%+6,85%=21,85%

Sí solo tenemos en cuenta el periodu de vixencia del últimu alcuerdu UGT, CCOO y Gobiernu la perda del nuestru poder adquisitivu de 2022 a 2024 va ser nel meyor de los casos del 16,7%IPC acumuláu–7,5% xuba acumulada de la paga= 9,2% de perda.

Dende SUATEA llevamos denunciando esta perda siguida del nuesu poder adquisitivu yá dende l’empiezu de la llamada “crisis de 2008” reivindicando añu tres d’añu:

• L’establecimientu d’una clausa de revisión salarial p’actualizar la xuba salarial  a la evolución real de la inflación, que nun tea supeditada a otros valores d’evolución de la economía, y afale la recuperación del poder adquisitivu perdíu.

 • L’aumentu del complementu específicu autonómicu de la nuesa nómina pa superar la fienda que nos dixebra de la media salarial estatal. Consiste na sustitución del incentivu a la evaluación, qu’unos cobren y otros non, por una medría llinial ya igual pa tolos cuerpos docentes.