Les recetes neolliberales impónense nel “Llibru blancu del nuevu Maxisteriu”

Les compañeres de la confederacón de STEs-i, de la que formamos parte’l SUATEA, tuvo accesu al borrador de la inminente reforma de la formación inicial universitaria del profesoráu d’Educación Infantil y Primaria. La base d’esta propuesta ta nes direutrices neolliberales que salen d’informes de la OCDE, como EURYDICE, TALIS o Education at Glance. Ye importante destacar que la OCDE tien como prioridá fomentar la figura del individuu competitivu como palanca de la productividá. Poro, les sos recomendaciones céntrense na empleabilidá pa axustase a les esixencies del mercáu y favorecer el crecimientu de les empreses.

ASPECTOS MÁS RELEVANTES

• Propónense pruebes d’accesu específiques dempués de la selectividá pa “seleicionar los perfiles más axeitados y comprometí­os, ameyorando’l prestixu y la equidá”. Esta midida yá s’aplica en Cataluña y Baleares (PAP: Pruebes d’Aptitú Personal) ensin que meyoren los resultaos académicos del alumnáu. Les universidaes privaes entamaron a abandonar el programa al baxar “los clientes”.
• Propónse un Prácticum más estensu, que s’entama dende’l primer cursu, al estilu de la FP dual. Contemplen incentivos económicos pa tutores de práutiques, tomando como referencia’l Marcu de Competencies Profesionales Docentes, que tien 4 niveles de desenvolvimientu y que lleva implícita una carrera profesional xerarquizada que fomenta l’individualismu y la competencia ente’l profesoráu.
• Les Decanes y Decanos amuesen un desconocimientu de la realidá del Cuerpu de Maestres y Maestres. Planteen programes de mentoría / MIR docente, al estilu “SENSEI” de Cataluña, y sitúenlu nel apartáu d’accesu a la profesión docente. Nun diferencien ente una maestra llamada d’una bolsa de personal interín (noveles) y la fase de práutiques d’aquelles escoyíes tres pasar el concursu-oposición. Nun saben que una maestra d’Infantil aprueba de media con más de 10 años d’antigüedá y que yá nun necesita nengún acompañamientu personalizáu. Los tiempos onde daquién podía sacar una plaza a la primera pasaron a la historia hai munchos años.
• Critícase la fragmentación actual del currículu y demándase un enfoque integráu, con una base sólida y común nes didáctiques disciplinares (Ciencies, Matemátiques, Llingua, etc.), que supere la mera especialización por menciones. Apuéstase por un enfoque competencial como los ámbitos y apartase de la especialización.
• Magar que excede del so ámbitu, analícense los problemes del procesu selectivu que lleva a la profesión docente: oposición, concursu y práutiques.
• Tán estudiando elevar el Maxisteriu a 5 años y la Secundaria a 4 más 2 años de Máster, lo cual favorecería’l negociu de les universidaes privaes online.