L’alumnáu migrante en FP nun puede facer práctiques por torgues burocrátiques

L’alumnáu migrante matriculáu en ciclos de Formación Profesional n’Asturies ta quedando ensin poder realizar les práctiques obligatories n’empreses por cuenta de la esixencia de tar dau d’alta na Seguridá Social mientres el periodu de formación n’empresa. Esta situación ta dexando nun llimbu educativu a estudiantes que pueden matriculase llegalmente en FP pero que, na práctica, nun pueden completar la so formación nin llograr el títulu.

La normativa estatal esixe dende xineru de 2024 que l’alumnáu tea dau d’alta nel Réxime Xeneral de la Seguridá Social mientres la so estancia formativa. Sicasí, para llograr esi númberu ye necesariu disponer de NIE, lo qu’esclúi a estudiantes que s’atopen en situación alministrativa irregular. Paradóxicamente, esti alumnáu puede matriculase nos ciclos formativos con pasaporte, pero depués nun puede facer les práctiques obligatories necesaries pa titular.

El problema yá ta detectándose en dellos centros asturianos. “Dase’l casu de familiares directos que tán estudiando lo mesmo, unu d’ellos va poder incorporase a la empresa porque la so situación alministrativa ta más avanzada, l’otru nun va poder”, esplica una docente asturiana.

Esto súmase a otres llagunes normatives derivaes de la implantación del nuevu sistema de Formación Profesional qu’esternaliza parte de la educación y ponla al serviciu de les empreses. El profesoráu señala, por casu, que l’alumnáu de la modalidá semipresencial —pensada precisamente para persones adultes que trabayen— nun ta atopando adaptaciones reales pa compatibilizar el so empléu coles estancies formatives n’empresa.

Esta problemática ye solo un exemplu más del desamparu que ta viviendo’l profesoráu de Formación Profesional dende la implantación del nuevu modelu. La total improvisación y la falta de respuestes per parte de l’Alministración educativa xeneró una sobrecarga de trabayu nel profesoráu que denuncia falta d’instrucciones clares, defectos na plataforma informática de xestión, dificultaes p’atopar empreses abondes pa les práctiques, ausencia de figures de prospección que la mesma llei preve, una creciente carga burocrática nos centros y una falta evidente de formación específica y sofitu institucional.

Too ello produzse amás nun contestu de creciente privatización del sector. Mientres la demanda de Formación Profesional supera yá’l millón d’estudiantes nel Estáu, l’aumentu de la ufierta ta siendo absorbíu en gran midida per centros privaos, que multiplicaron la so presencia na última década, especialmente na modalidá online.

Reclamamos a la Conseyería d’Educación que dea una respuesta inmediata a estes situaciones d’incertidume y falta de reglamentación y garantice que nengún estudiante quede escluyíu de la so formación por torgues alministratives. “La educación tien de ser un camín escontra la inclusión y la igualdá d’oportunidaes, non un llaberintu burocráticu qu’espulsa precisamente a quien más precisen la formación”.