L’alministración nun atiende les demandes sindicales. Solo queda la movilización

Depués de tar ayer, llunes 15 de xunu, más de trés hores reuníos na Conseyería, ésta nun recueye les demandes presentaes pola Xunta de Personal en defensa de los intereses del profesoráu asturianu.

Dende SUATEA defendimos la prórroga nel contratu d’aquellos docentes interinos que nun saquen vacante pa poder examinar al alumnáu al que-y punxeron clase; argumentemos los problemes que xenera l’aplicación de la Resolución sobre Salú Llaboral (el llamáu “Medicamentazu”), solicitemos que la Resolución sobre’l préstamu de llibros nun s’aplicara esti cursu, que fuera voluntaria un año más y denunciemos les consecuencias de la implantación de los Programes de Meyora del Aprendimientu y el Rendimientu, onde la única solución ye la moratoria na aplicación de la LOMCE.

Énte la falta de receptividá, la impotencia d’algamar que se mos escuche y la falta d’información n’asuntos tan trascendentes como son la minoración de la plantiya publicada n’abril nes propuestes unviaes a los centros pa demandar les necesidaes pal cursu que vien, solo mos queda una salida: la movilización.

De manera conxunta, toles organizaciones sindicales que conformamos la XUNTA DE PERSONAL DOCENTE, convocámosvos a participar na concentración d’esti xueves 18 de xunu a les 18:00 hores na Plaza d’España

CONTRA’L RECORTE DE PLACES EN PLANTIYA

POR UNA XESTIÓN EFICIENTE DEL BANCU DE LLIBROS

CONTRA’L MEDICAMENTAZU

POR MEYORES CONDICIONES LLABORALES

Cartelu pal tablón del centru