La presión social y política fai que’l MECD modifique les reválides

Ayeri, na Conferencia Sectorial d’Educación, el ministru Íñigo Méndez de Vigo y les alministraciones educatives autonómiques alcordaben atenuar les evaluaciones finales de 6º de primaria y 4º d’ESO y reconvertir la reválida de 2º de Bachilleratu nuna prueba d’accesu a la universidá asemeyada en dellos aspeutos a la que s’aplicó hasta agora. Amás, güei nel Conseyu Escolar del Estáu, el ministeriu anunció la derogación del  RD 310/16, pol que se regulen les evaluaciones finales d’ESO y Bachilleratu, y retiró’l borrador d’Orde que lu desarrollaba.

Dende SUATEA sicasí, constatamos que magar d’estes afirmaciones, el ministeriu sigue calteniendo la evaluación de 3º de Primaria con calter xeneral pa tol alumnáu. Les reválides de 6º de primaria y de 4º d’ESO pasaríen a ser muestrales  pa ser realizaes pol alumnáu que les  CCAA decidan. Poro, los centros educativos van siguir tando condicionaos pola posibilidá de ser incluyíos nestes reválides que se caltienen  hasta la llegada del llamáu Pactu pola Educación.

Amás, caltiense l’espíritu de segregador a partir  de 2º d’ESO condicionando la esistencia de los itinerarios de 3º y 4º d’ESO. L’alumnáu recibe una formación devaluada ensin los programes de sofitu necesarios, colo que magar que la titulación sía única, va tener torgues pa la continuidá de los sos estudios en FP o Bachilleratu.

Tampoco hubo nengún xestu de considerancia escontra’l profesoráu. Censales o muestrales, les pruebes siguen esistiendo y caltiense con ello la rocea escontra un profesoráu que nun ve rebaxaes les xeres burocrátiques derivaes d’estos procesos cola LOMCE. Les reválides son innecesaries y el gobiernu tendría de comprometese a la so desapaición total.

El ministru non solo “sigue creyendo na evaluación”: el Gobiernu del PP tampoco arrenunció de la so voluntá de que la oposición retire la Proposición de Llei de paralización del calendariu LOMCE nin d’allegar al Constitucional pa torgala. Esti cambéu de les reválides per parte del MECD nun ye frutu del so convencimientu, sinón de la presión exercida pola movilización de la comunidá educativa y  del refugu de la oposición política. El cambéu que se precisa demanda un diálogu sobremanera social, coles fuerces y les organizaciones que representamos a la Educación Pública y una medría sustancial del so financiamientu.

SUATEA esixe yá la derogación  del RDL 12/14, de midíes urxentes de racionalización del gastu públicu nel ámbitu educativu, col amenorgamientu del horariu lectivu pa tol profesoráu, la cobertoria inmediata de les sustituciones  y tamién la derogación definitiva y ensin arrodios de la LOMCE. SUATEA va caltener la movilización social y educativa de manera firme como estratexa imprescindible p’algamar una educación pública democrática, igualitaria, llaica y coeducativa.

Secretariáu de SUATEA/STEs-intersindical

29 de noviembre de 2016