La precariedá y la falta de docentes van marcar l’entamu de cursu

La Conseyería d’Educación publicó la ufierta de places pal  próximu cursu. Trátase de 2722 places que se destinen al profesoráu interín y que van ser axudicaes definitivamente’l 30 d’agostu. Esta cifra amuesa la grave situación de precariedá na que s’atopa’l sistema educativu asturianu: una bona parte de centros cunten con plantiyes inestables que cada cursu varien, colos perxuicios qu’eso supon pa tola comunidá educativa.

Nesta convocatoria falten munches places, como les de los Centros de Persones Adultes, sustituciones para tol cursu o xubilaciones que tán previstes para principios de setiembre. Ye dicir qu’un cursu más el profesoráu interín nun va tener la oportunidá de garrar toles vacantes y los centros van tener qu’empezar les clases ensin el profesoráu necesariu. Según l’alcuerdu d’interinos anguaño a valir nun se dexa la meyora de puestu, una propuesta de SUATEA por que’l profesoráu pudiera garrar les nueves places qu’ensin dulda van salir na siguiente convocatoria y qu’esiste n’otres CCAA.

A día de güei los centros educativos siguen ensin tener respuesta sobro les necesidaes de plantiya solicitaes polos equipos directivos, polo que les direcciones van verse obligaes a entamar el cursu ensin conocer la dotación exacta de les plantiyes. La Conseyería d’Educación escúdase’n que va ser en septiembre, al zarru de les matrícules, cuando s’autoricen les necesidaes. El gran problema ye que’l zarru de matrícula ye’l 7 de setiembre y el cursu empieza’l día 13. Esto torga que’l centru pueda ufiertar toles materies solicitaes pol alumnáu que si deseya cursar determinao materia rellacionada col so futuru académicu y nel so centru ufiértase, vese obligáu a camudar de centru. La falta de docentes fai qu’haya profesoráu tutor qu’imparta xuna asignatura optativa y  por tantu que nun conoza a parte del alumnáu y en primaria obligar al profesoráu especialista a desempeñar les tutoríes incumpliendo asina los alcuerdos de plantiyes.

L’abusu de les medies xornaes ye la consecuencia del intentu d’axustar les plantiyes al mínimu. La proliferación d’esti tipu de contratos precarios va creciendo cada cursu. Nesta convocatoria’l porcentaxe de places a media xornada yá supera’l 32%, sobremanera n’Enseñanza Secundaria. La Conseyería impón la precariedá a un terciu del profesoráu que llogre plaza nesta primer convocatoria. Trátase d’una situación inadmitible que curso tres cursu va convirtiéndose en práctica habitual. Pa SUATEA ye imprescindible acabar con esta situación d’inestabilidá y precariedá que cada añu empiora, axustar un nuevu alcuerdu d’Interinos que recueya la meyora de puestu y llograr que la convocatoria de les próximes oposiciones docentes sirva pa estabilizar al profesoráu interín

Uvíeu 19 de xunetu de 2017