La LOMLOE, una fonte de frustración y desencantu ente’l profesoráu asturianu

La implantación de la LOMLOE convirtiose dende el cursu pasáu n’unu de los oxetivos principales de la Conseyería d’Educación. Dende SUATEA, d’acordies con otres organizaciones sindicales, plantegamos a la  Conseyería la conveniencia d’aprovechar esti cursu 2022-23 pa dir entamando l’aplicación práctica de la mesma , ensin imponer plazos inmediatos al profesoráu . Una Llei qu’impon cambeos de caláu nel funcionamientu del sistema educativu nun debe d’empezar a aplicase ensin prever con antelación el procesu de desenvolvimientu , concreción y aplicación de la mesma .

Sicasí , la Conseyería fixo casu omiso a estos pidimientos y decidió empecipiar el procesu , entá sabiendo que yeren munchos los flecos que taben por encetar. De primeres, taba la paradoxa d’empecipiar el cursu ensin conocer siquier cuálos yeren los currículos que correspuenden a cada especilidá, cómo se diben a realizar les programaciones correspondientes, cuálos van ser los criterios educativos que se van utilizar a lo llargo del cursu , cómo se concretaríen los cursos de formación pal profesoráu  y demás.

Al refugar el pidimientu de retardar la so aplicación hasta el próximu cursu , la Conseyería  impunxo unos plazos que se tán convirtiendo nuna fonte frustración y afandu pal conxuntu de la plantiya docente . El fechu de que bona parte de los docentes tuviéramos que trabayar nel desenvolvimientu de distintes lleis educatives que s’asoceden unes a otres según prodúcense los cambeos de gobiernu ye un elementu de frustración y malestar, teniendo en cuenta que tol trabayu que na actualidá ta desenvolviéndose puede resultar un esfuerzu baldío, teniendo en cuenta que’l principal partíu de la oposición yá manifestó el so deséu de dar en la derogación de la *LOMLOE si en dalguna ocasión llega a faese coles riendes del gobiernu .

La pasada selmana empecipióse un cursu de formación de quien desempeñen nos centros la figura de Coordinador de bienestar emocional del alumnáu . Múltiples fueron les quexes recibíes per parte de persones que participaron na citada actividá por cuenta de que na mesma informóse de los requisitos a cumplir por quien ostenten esa responsabilidá de la que se -yos informaba d’un eleváu númberu de funciones a realizar. Yá en septiembre, coincidiendo col entamu de cursu , dende SUATEA denunciamos que lo que se precisa pa llevar a cabu esa función ye ampliar los recursos y la reconocencia d’esi trabayu nel horariu lectivu del profesoráu en llugar de dexalo a la *disponibilidad horaria esistente nos centros. La Conseyería sigue aprovechándose del voluntarismu d’un profesoráu qu’adulces va consumiendo la so paciencia .

Convien recordar cómo lleguemos a esta situación. El Gobiernu central y el Ministeriu d’Educación, aprovechando la pandemia , tramitaron a toa velocidá una nueva Llei  ensin consultar apenes a la comunidá educativa . Nel so momentu señalamos que tábamos ante una Llei que tenía numberosos elementos de meyora . Reconocemos l’esfuerzu y la responsabilidá profesional del profesoráu que vien trabayando dende l’entamu del cursu pa poder cumplir colos oxetivos que se plantegen dende l’Alministración. Y denunciamos qu’esti trabayu vien efectuándose metanes un creciente afandu . Nin los plazos dexen cumplir colos propósitos a tiempu, nin se tán resolviendo les incertidumes que xeneren una metodoloxía y terminoloxía nueves tollo a la espera d’una formación que nun acaba de llegar. Nos últimos díes conocimos distintos propuestes de refuga surdíes en dellos centros referíes a aspeutos concretos rellacionaos cola aplicación de la Llei . Creemos que la Conseyería tendría d’emprestar atención a estos fechos si nun quier correr el riesgu de que la resultancia final sía un refugu fronteru dende el profesoráu tantu escontra la nueva Llei como escontra les sos propies instrucciones.