La Conseyería fai caxa

L’arca del dineru publico, maltratada y afuracada colos sobrecostes d’El Muselón, la Regasificadora, el Casu Marea, el Casu Villa… hai que la recebar arrañando perres d’onde se puea. El Gobiernu asturianu, al traviés de la Conseyería d’Educación, va faciendo caxa coles pingarates que paña de les dietes del profesoráu itinerante que lleva ensin cobrar dende qu’entamó’l cursu, de los pieslles y fusiones de centros pal cursu que vien y de la mengua sangrante nes partíes económiques tresferíes a los centros educativos pal so gastu corriente.

El pasáu llunes día 29 febreru de 2016, SUATEA xunto col restu de sindicatos representaos na Xunta de Personal docente non Universitario d’Asturies (XPD), foi convocáu a un conceyu informativu per parte la Conseyería Educación onde mos rellataron los cierres y fusiones de centros que diben efectuar pal cursu que vien. Esa información yá la recoyía la prensa’l día enantes d’aconceyase con nosotros, lo que ye señal de que pa decidir estes graves cuestiones, nun se cuntó pa nada cola nuestra opinión. Denunciemos ellí mesmo’l menospreciu que se fai por nun cuntar colos/es trabayadores a la hora de tomar decisiones que van recortar, de mano, puestos de trabayu pal profesoráu interín y, de siguío, puestos nes plantiyes de profesoráu fixu. Estes decisiones fueron tomaes per detrás de la comunidá educativa (nesi conceyu informósenos que tovía nun taba tomada la decisión de pesllar la escuela Muries nin la de Soto de Trubia, pero anunciáronse les dos al otru día). Persabemos que les asociaciones de padres y madres (AMPA) de munchos d’estos centros, y tamién les direcciones, tán oponiéndose dafechu. Significativu ye’l casu del cierre de la escuela de Muries, nel conceyu Mieres, onde l’Equipu de Gobiernu y tolos grupos municipales quitando’l PSOE, asina como l’AMPA tán contra’l cierre. Estes decisiones incumplen los alcuerdos de plantiyes apautaos coles organizaciones sindicales onde s’establez que los centros han siguir abiertos con cuatro o más alumnos y agora tránquense con nueve, seis y cinco alumnos/es. La Conseyería miente cuando diz qu’informó y que cuenta coles comunidaes educatives de los centros. Poro, si nun cuenta col conocimientu de les condiciones reales de cada escuela y la so rodiada socioeconómica, que sí conocen tanto la comunidá educativa como los sindicatos, y agora a tou trapu toma decisiones qu’afecten al Mapa de la Rede de Centros. ¿Ónde ta la obligatoria planificación educativa? Cuidamos qu’igual ta debaxo de la caxa rexistradora.

A la caxa rexistradora van tolos cuartos que se-y deben al profesoráu itinerante dende primeros de cursu en conceptu de dietes por kilometraxe. Hai qu’alcordase que’l profesoráu itinerante pon el coche, el seguru, la conducción y adelanta les perres del combustible (en dellos casos más de 600€).

Pa la fardela van tamién munches de les perres que la Conseyería mandaba a los centros pal gastu corriente hasta’l mes de febreru. Esti mes de marzu, tolos centros que teníen dineru aforrao en caxa pa gastos imprevistos, plasmaron al ver como la Conseyería-yos quitaba de la so asignación presupuestaria (la mesma que l’añu pasáu) la cuantía de lo aforrao. Sabiendo que los centros cada vez tienen más gastos de funcionamientu (fotocopiadores, papel, material d’oficina, caltenimientu d’equipos informáticos…) qu’inciden directamente na calidá educativa. Cola mesma sida, quiten ciclos de la Escuela de Montaña pa ponelos en manes de la xestión privada. La Conseyería vuelve a poner los criterios economicistes percima de tolo demás.

Por tolo espuesto, SUATEA, afalamos a la Conseyería d’Educación a dexar d’aplicar más recortes y pensar solo en facer caxa; a respetar los derechos de los/les trabayadores; a priorizar la calidá educativa y a presentar a la xente asturiano unos presupuestos que garanticen la prestación de los servicios básicos a los que tienen derechu.