La casa pel teyáu: SUATEA énte la propuesta de cambéu del RD 276/2007

SUATEA ÉNTE LA PROPUESTA DE CAMBÉU DEL RD 276/2007 D’ACCESU A LOS CUERPOS DOCENTES y L’ABUSU DE CONTRATACIÓN DE PERSONAL INTERINO PER PARTE DE L’ALMINISTRACIÓN

El pasáu vienres, 17 d’avientu, el Ministeriu d’Educación presentó un borrador de Real Decretu que pretende modificar el RD 276/2007 que regula’l reglamentu d’ingresu, accesu y alquisición de nueves especialidaes nos cuerpos docentes, y regula’l réxime transitoriu d’ingresu a que se refier la disposición transitoria decimoséptima de la Llei Orgánica 2/2006, d’Educación. Esi borrador va llevase a Mesa Sectorial de negociación mañana martes, 21 d’avientu. Nada sospriende yá -sobro los plazos d’urxencia- nesta fuxida esprecetada cola que les distintes alministraciones pretenden azorronar l’enorme fraude qu’elles mesmes provocaron.

Tocántenes al conteníu de la propuesta de cambéu, tanto dende los STEs como dende SUATEA queremos comunicar el nuesu fondu desalcuerdu porque’l testu nun respuende, pa nada, al principal oxetivu a algamar: asegurar la estabilización del personal docente interino en situación d’abusu que más esperiencia atropa y que, por tanto, arrecostinón más años cola contratación temporal.

Amás, cuidao qu’a la fin se reconoz la llegalidá d’un accesu estremáu – concurso-oposición y concursu de méritos- que ye lo que siempres defendimos dende los STEs, el cambéu de la doble vía d’entrada tien de quedar establecida, non de forma transitoria o escepcional, per una sola vegada, sinón como sistema que garantiza la oportunidá de estabilización al colectivu interín independientemente de los años d’esperiencia previa que tenga cada cual. D’esta miente, quien nun superen los procesos selectivos nos trés primeros años de la so vida llaboral pol sistema de concursu-oposición y formen parte de les llistes d’aspirantes a interinidá, desempeñando puestos docentes de forma temporal, van poder optar al concursu de méritos cuando atropen más de 3 años d’antigüedá. Nesti sentíu, convien recordar que na nueva redacción del artículu 10 que figura en Proyectu de Llei de midíes urxentes para l’amenorgamientu de la temporalidá nel empléu públicu (procedente del Real Decretu-llei 14/2021, de 6 de xunetu), contémplase la posibilidá de prorrogar el periodu d’interinidá más allá del máximu de 3 años axustáu con calter xeneral, d’alcuerdu a les esceiciones que figuren nel puntu 4 del citáu artículu.

Poro, el cambéu del accesu a la función pública docente tien d’asegurar, primero de too, la estabilización del personal interino con mayor antigüedá por aciu un sistema de concursu de méritos que valore percima de cualesquier otru apartáu, y de la suma de toos ellos, la esperiencia docente previa y solo dempués, entamar los procedimientos selectivos por cuenta’l sistema de concursu-oposición. Esto implica una inspección previa, tan escrupulosa como tresparente, de les places oxetu d’ufierta pall concursu de méritos.

Énte la opacidá qu’amuesa l’Alministración Educativa asturiana nel cómputu de places cubiertes temporalmente de forma fraudulenta, dende SUATEA tratemos de pescudar qué podría tar asocediendo en base al analís del Proyectu de Llei de presupuestos Xenerales del Principáu d’Asturies para 2022. Tocante a los gastos en personal docente d’Educación -Tomu 8 del citáu testu: Informe de personal-, presupuéstense los gastos para un total de 10853 trabayadores  docentes: profesoráu fixu (funcionarios de carrera) más profesoráu interino. Per otru llau, la cifra de puestos docentes afitada nos Alcuerdos de plantiya de los últimos años – en redol a 9378- apenes varia entre 10 y 20 places d’un cursu a otru. Pa deducir el númberu de puestos docentes en réxime d’interinidá, solo hai que restar del total de 10853 presupuestaos, los 9378  de los que se va componer, aprosimao, la plantiya pa 2022, y el resultáu d’esa operación ye: 1475 places presupuestaes pa personal docente interino.

Sicasí, namá entre les  dos primeres convocatories del actual cursu escolar 2020/21 contratáronse unes 3000 persones interines pa ocupar places vacantes a xornada completa hasta últimos de cursu. Surde, entós, la entruga énte esta paradoxa ¿Cómo ye que se presupuesta pa 1475 interinos/es y pue pagase a 3000? La respuesta ye cenciella: les aprosimao 1500 persones interines, aparentemente non presupuestaes, tán dientro de la plantiya orgánica/estructural. O lo que ye lo mesmo: ta contratándose añu tres d’añu a personal interino pa ocupar puestos de plantiya orgánica.  Ello xenera un flagrante abusu na contratación de personal temporal (interinos/es- más del 30% de l’actual plantiya), incurriendo asina la Conseyería d’Educación  en fraude de llei y abusu na contratación temporal del personal, si tenemos en cuenta la Directiva 1999/70 CE, de 28 de xunu, relativa al Alcuerdu Marco de la CES, la UNICE y el CEEP sobre’l contratu de duración determinada.

Poro, dende SUATEA esiximos:

• La inmediata inspección de les places susceptibles d’axudicar por aciu’l concursu de méritos y la acreditación de les mesmes con total tresparencia.
• Que l’Alministración educativa asturiana nun atestone con caltener una convocatoria d’oposiciones como les convocaes pa 2022  ensin conocer cuál va ser el marcu estatal definitivu que regule l’ingresu a la función pública docente ya que, de caltenese la convocatoria en vigor, puede causar graves perxuicios al colectivu de docentes interinos al serviciu d’esta Conseyería d’Educación, esto ye, perxudicar la estabilización de les/los sos  trabayadores.