IES Roces: Nun yera un grupu minoritariu

Nun yera un grupu minoritariu: SUATEA considera que l’equipu directivu del IES Roces tien de dimitir y pregúntase qué fai la Conseyería

A entamos d’esti cursu, el sindicatu SUATEA fixo públicu na prensa’l casu del IES Roces, onde parte del profesoráu denunciaba un clima llaboral irrespirable. La direición del centru respondió de siguío afirmando que les acusaciones yeren infundaes y que procedíen d’un grupu de docentes mui minoritariu, al que-yos atribuyó la responsabilidá de los problemes. Sicasí, el Serviciu de Prevención de Riesgos Llaborales yá detectara que nel centru trabayábase en condiciones de riesgu psicosocial.

El pasáu 26 de payares, l’equipu directivu decidió finalmente someter la so xestión a la valoración del claustru. El resultáu foi claru: namás el 35% de los votos respaldó la so actuación, frente a más del 51% (mayoría absoluta) que votó en contra. Y esto asocedió incluso tres de que l’equipu directivu, na so comparecencia énte’l Comité de Salú Llaboral, afirmara tar aplicando midíes pa meyorar el clima y pa democratizar los claustros. O bien eses midíes resultaron poco efectives, o la situación previa yera entá peor.

Sicasí, el problema nun ta llendáu al equipu directivu: tamién recae na Conseyería, que permitió que la situación s’enquistara hasta esti puntu. ¿Qué fixo la Conseyería cuando, en 2019, un grupu de docentes rexistró formalmente un escritu detallando les sos quexes sobre’l funcionamientu del centru? La rempuesta ye: nada. ¿Qué fizo dende que estalló’l casu? Nada. ¿Qué va facer d’equí p’alantre? Muncho nos tememos que la rempuesta nun vaya camudar.

Tres esti resultáu, al equipu directivu namás-y queda presentar la so dimisión y, si nun lo fai, tien de ser la mesma Conseyería quien intervenga. Una vez queda constatáu’l descréditu d’esti equipu directivu nel so propiu claustru, si nun dimiten, yá nun hai más responsabilidaes qu’esixí-yos a ellos: la responsabilidá de tolo qu’ellí asoceda va ser de la Conseyería por nun actuar. Va selo por nun intervenir enantes y por nun destituir al equipu directivu nin encarar de mou decidíu la situación del IES Roces.

Y dicimos encarala de mou decidíu porque nun abonda con relevar al equipu directivu. Hai que preguntase: ¿y dempués, qué? ¿Vamos poner a daquién al frente d’una situación esplosiva pa llueu culpalu de que nun s’arregle sola? Va ser necesario reconducir el funcionamientu del centru, y pa ello la Conseyería tendrá dotalu de más recursos —¿nun ye una compensación xusta tres años desentendiéndose de problemes tan graves nun institutu d’esti tamañu?—, amás de proporcionar acompañamientu al profesoráu como al nuevu equipu directivu. La Conseyería ye responsable pola so inacción y la falta cometida esixe una reparación en condiciones.

Poro, dende SUATEA señalamos dafechu a la Conseyería y preguntámonos ¿qué va facer agora? Entendemos que la pelota ta nel so teyáu y que, d’equí p’alantre, la responsabilidá ye 100% de so.