Formación ensín coeducación

Dende’l sindicatu SUATEA queremos amosar la nuestra sorpresa al ver que’l programa del Cursu de Funcionariáu en Práctiques 2023-2024 de la Conseyería d’Educación, qu’empieza esti xueves, 25 de xineru, nun fai mención nenguna a la coeducación nos conteníos a tratar y, por tanto, nun contempla la formación en materia de coeducación en nenguna de les siete sesiones de les que consta.
Hai que recordar que la nueva Llei d’Educación 3/2020 -LOMLOE- tien ente los sos principios rectores la igualdá ente muyeres y homes. La norma refuerza esti enfoque al traviés de la coeducación y impulsa en toles etapes educatives la igualdá efectiva de muyeres y homes. Amás, indícase que los centros tienen qu’incluyir y xustificar nel so proyectu educativu les midíes que desenvuelvan pa favorecer y formar n’igualdá en toles etapes educatives, incluyendo la educación pa la eliminación de la violencia de xéneru, el respetu poles identidaes, cultures, sexualidaes y la so diversidá, y la participación pa faer realidá la igualdá. Esisten, amás, otres dos Lleis Orgániques d’obligáu cumplimientu que directamente se rellacionen cola educación n’igualdá: Llei Orgánica 1/2004, de 28 d’avientu, de Midíes de Protección Integral contra la Violencia de Xéneru y Llei Orgánica 3/2007, de 22 de marzu, pa la igualdá efectiva de muyeres y homes.

¿Cómo ye posible que dende la Conseyería d’Educación nun s’ufierte formación nenguna en coeducación al profesoráu qu’acaba de superar un procesu selectivu nel que’l marcu llegal indica, per primer vegada y de manera clara, que la igualdá ente muyeres y homes ye un principiu que tien que rexir tola acción educativa?
El mesmu Plan de Coeducación del Principáu d’Asturies, mentáu nel Decretu 30/2023, de 28 d’abril pol que se regula la Coeducación nel sistema educativu asturianu, contempla acciones de formación y materiales en materia d’igualdá, tanto del personal docente como del personal non docente.
Hai que recordar, amás, que les nuestres dos comunidaes vecines, Cantabria y Galicia, sí contemplen nos sos respectivos cursos de funcionariáu en práctiques formación en materia de coeducación. Cantabria con una sesión formativa de 3 hores al cargu de la Unidá Técnica d’Igualdá y Coeducación y Unidá Técnica de Mediación, y Galicia con un cursu de 20 hores en “Coeducación y convivencia” nel que s’ufierta formación básica en coeducación, col focu na igualdá d’oportunidaes y na violencia de xéneru.

Poro, dende SUATEA denunciamos l’incumplimientu de les midíes preceptives en materia de formación del profesoráu per parte de la Conseyería d’Educación asturiana, al nun incluyir formación en coeducación pal profesoráu en práctiques, dexando la igualdá en manos de la voluntariedá d’esti y esiximos tómense les midíes oportunes pa iguar esta falta.

El Secretariáu de la SUATEA,
N’Uviéu, a 24 de xineru de 2024