Facer sindicalismu nun ye delitu. ¡Nun nos van doblar!

La ratificación pol Tribunal Supremu de la sentencia condenatoria a les 6 de La Suiza, con penes de trés años y mediu de cárcel a les compañeres de la CNT de Xixón y una multa de 125.428 euros en conceptu d’indemnización, ye un golpe de toes al sindicalismu que quieren facer pagar colos vuestros cuerpos, pero nun tais soles. Como trabayadores y sindicalistes, tamos con vós. La llucha sigue.

A lo llargo de tou esti tiempu, conocimos los avatares d’un procesu marcáu poles irregularidaes y arbitrariedaes (siempre presuntes cuando se fala de la Xusticia). De toles maneres, qu’un conflictu llaboral precisare más de seis años pa resolvese y que’l resultáu seya l’aplicación de penes de cárcel a seis persones paeznos escandaloso porque, nun podemos escaecelo, trátase d’un conflictu llaboral y lo que se condena ye’l sindicalismu qu’arrodió’l casu y non les práctiques abusives denunciaes.

La vixencia de la Llei Orgánica 4/2015, de 30 de marzu, de protección de la seguranza ciudadana (Llei Mordaza), repetímoslo hasta fartucar, ye una espada de Damocles pal activismu social y sindical. La so utilización arbitraria funciona como una máquina de meter mieu pa callar protestes y desmovilizar, p’afogar a persones y organizaciones.

El pidimientu de penes de cárcel, y sentencies como ésta, la de Les 6 de Zaragoza o la de Les 3 del SAT, son cada vez más frecuentes, intentando normalizar na nuestra supuesta democracia característiques propies de rexímenes dictatoriales pa criminalizar l’acción sindical.

Dende la Intersindical Asturiana queremos manifestar, una vez más, la nuestra solidaridá colos compañeros y les compañeres condenaes pol Casu La Suiza, condenamos la represión cada vez más grande sobre l’activismu social y el sindicalismu alternativu, y anunciamos la nuestra disposición a movilizanos cada vez que seya menester. Una cosa tenemos clara: nun nos van doblar.

N’Uviéu, a 25 de xunu del 2024