La visión de futuru de les neñes: 11 d’ochobre, Día Internacional de la neña 

L’enfotu esti añu na cellebración del Día Internacional de la neña ye la esperanza d’un futuru de plenu derechu. Cola creación d’esti Día –afitáu pola Asamblea Xeneral de les Naciones Xuníes en 2011– reconozse la necesidá d’equiparar los derechos y oportunidaes de les neñes y dar a conocer los desafíos únicos a los que s’enfrenten.

Dende les Naciones Xuníes aporten datos que nos sitúen nun presente que sigui discriminando sobremanera a les neñes y en tolos ámbitos: sanitarios, educativos, familiares, económicos o culturales, ente otros. 

• Anguaño, cuasi 1 de cada 5 neñes nun acaben el primer ciclu de secundaria y casi 4 de cada 10 neñes nun acaben el segundu cliclu de secundaria, calculándose que cada añu adicional d’educación secundaria que recibe una neña, los sos ingresos potenciales aumenten alredor d’un 10-20%. 
• Alredor del 90% de les adolescentes y muyeres moces nun usen interné nos países de renta baxa, demientres que los sos compañeros varones tienen el doble de probabilidaes de conectase.  
• En tol mundu, les neñes d’ente 5 y 14 años, dediquen 160 millones d’hores diaries más al trabayu domésticu y de curiaos non remuneraos que los neños del tiempu. 
• Les adolescentes siguen cuntando 3 de cada 4 nueves infecciones por VIH ente la xente mozo. 
• Cuasi 1 de cada 4 adolescentes casaes o en pareya d’ente 15 y 19 años foi víctima de violencia física o sexual per parte de la so pareya polo menos una vez na vida. 
• Calcúlase que más de 100 millones de neñes cuerren riesgu de contraer matrimoniu infantil nos pŕoximos 10 años, anguaño 12 millones de neñes son obligaes a casase. 
• Una de cada tres adolescentes carez d’anemia pola mor de la malnutrición. 
• Cuasi’l doble de neñes que de neños nun recibe formación o educación nenguna. 
• Más de 4,4 millones de neñes tan en riesgu de padecer mutilación xenital femenina en 2024, principalmente n’África. 
• La probitú tien xéneru: 1 de cada 5 neñes vive en situación de probitú estrema. 
• L’albuertu selectivu sígue prauticándose en delles partes del mundu cuando se sabe que vei nacer una neña. 

Tenemos la obligación de promover l’empoderamientu de les neñes y afitar el cumplimientu de los sos derechos humanos, sofitándoles pa que sean a desarrollase ensín llendes y convertise n’axentes de cambiu nes sos comunidaes. 

La discriminación a les neñes antepónse a la propia nacencia, xenerando espectatives y prexuicios condicionaos pol so sexu y van desendolcase en toles etapes de la so vida, d’una forma violenta y coercitiva o de formes más suaves y normalizaes socialmente. 

Como recueye Unicef: Nel mundu hai más de 600 millones de neñes adolescentes de 10 a 19 años, el mayor númberu de la historia. Si cuenten colos recursos afayaízos, les oportunidaes y un entornu amañosu, estes neñes van convertise na mayor xeneración de muyeres llíderes, emprendedores y creadores de cambiu que viera’l mundu. 

Dende la Organización de Muyeres encamentamos a los responsables poíticos y a tola sociedá en conxuntu a lluchar de mou tresversal y específicu p’apurrir les ferramientes educatives, económiques y sociales a les neñes pa que, amás de combatir una discriminación histórica, se posibilite un cambiu social dende dientro, pol propiu impactu positivu que tienen los avances nos derechos de les neñes nes sos families, comunidaes y sociedá. 

Anguaño los progresos sociales amenacen con estancase: les guerres, la pandemia, los movimientos ideolóxicos d’estrema derecha y el desaniciu del sofitu oficial al desarrollu, xunto cola emerxencia climática que pega con especial fuercia a los más vulnerables, conducen a que los oxetivos de desarrollu sostenible paezan más llonxanos que nunca. 

Urxe la llamada a l’acción pa lluchar contra la discriminación de les neñes pol fechu de selo y que la visión d’un futuru sofitáu na equidá, na educación de calidá y de baldre, y nel máximu desendolcu de los sos proyeutos vitales nun seya un suañu.