8M: Son tiempos de llobos

La Organización de Mujeres de la Confederación Intersindical, a la que pertenez SUATEA, vien de denunciar recientemente l’usu indebíu y poco tresparente de fondos públicos destinaos a la llucha contra la violencia machista per parte de distintes alministraciones autonómiques y llocales.

El Pacto de Estado contra la Violencia de Género lleva años en funcionamientu pero, en febreru del 2025, aprobóse nel Congresu de los Diputaos una renovación del mesmu. Esta renovación supón, ente otres midíes como la  incorporación de nueves formes de violencia o la especial consideración de factores como vivir en zones rurales o tener alguna discapacidá, un aumentu significativu de la dotación económica del mesmu hasta un total de 1.500 millones d’euros pa los 5 años siguientes. La cantidá que queda en manes d’alministraciones fuera del estáu nun ye menor: 160 millones añales pa les comunidaes autónomes y otros 40 añales pa los conceyos.

La única formación política que votó a la escontra de dicha renovación, en coherencia cola so postura sistemática de negación de la violencia machista, fue Vox. El problema vien cuando en munches alministraciones autonómiques y llocales la estrema derecha se convierte en xestora de la dotación económica que por – casi – unanimidá se decide que tien que ser mayor.

¿Qué sabemos de quien dispón l’usu d’estos y otros fondos?, ¿y de quien puede tener nel futuru cercanu tovía más poder sobre los mesmos? Podemos facer un percorríu per una serie d’eventos que, si bien pueden paecer anecdóticos, son en realidá bien significativos.

Por exemplu, en 2019, la que poco depués sería candidata de Vox a la presidencia d’Asturies, apaecía nel videu de “La mesma revolución” de l’artista Silvia Quesada. Esti tema, que la propia Quesada definía como “canción feminista” y qu’amás tien la so lletra n’asturianu, estrenóse’l día 8 de marzu d’aquel añu. La única esplicación que llegó dende la rodiada de la política foi qu’apaeciera nel videu por “facer un favor a una conocida”, anque choca bastante escuchar el tema teniendo en cuenta qu’ella mesma prometió que si llegaba al poder diba zarrar “todos los organismos innecesarios, como el Instituto de la Mujer” poco depués de cantar nuna llingua que según les sos declaraciones “no existe” y que’l gobiernu socialista ta intentando “imponer” n’Asturies.

Va poco más d’un añu un diputáu de la mesma formación defendió la eliminación de la coeducación de los programes educativos asturianos, afirmando que’l feminismu ye tan malu como’l machismu y llamando “mamarrachadas y chochocharlas” a les actividaes que van nesti sen. Una diputada del PP y exmaestra de relixón anunció, pela so parte, la so intención de derogar el decretu que regula la coeducación cuando gobierne’l so partíu, ya que’l plan que lu desarrolla “nace del feminismo más radical y no es adecuado para nuestros niños”.

A entamos d’esti añu 2026, l’alcalde d’Uviéu llamaba “verdulera” a una conceyala de Vox nun plenu, insistiendo en que yera una “maleducada” y que “no sabe callarse”. La edil nun contestó en declaraciones posteriores más que l’alcalde podía ser asina de “vehemente” colos sos “socios socialcomunistas”. Nun pudo calificar de machista l’insultu recibíu nin les formes aplicaes porque la so formación ye negacionista del machismu, como del asturianu, del cambiu climáticu y de tantes otres realidaes.

Poco depués, el mesmu diputáu que falara de “chochocharlas” proponía pesllar y privatizar Les Escuelines por considerales “un despilfarro”. Dos años primero acusara a la rede d’adoctrinar a les neñes y neños.

Otru asturianu que consigue davezu colar les sos intervenciones en tolos medios y en toles tertulies ye’l secretariu xeneral del grupu parllamentariu de la mesma formación, con apellíu garráu pola so familia d’una parroquia mierense. Esti políticu siempre tuvo les coses clares – a lo meyor tien que ver con ser home y venir d’una familia dueña de media Asturies – , lleva afiliáu al partíu dende la so fundación y yá va años que declara cuestiones como que nun cree que la violencia seya “machista o no machista”, sinón que ye “violencia en el seno de las familias y las parejas”.

Como diz Nacho Vegas nel so últimu discu, son tiempos de llobos, nos qu’algunos políticos difunden dende les instituciones y al traviés de les redes sociales – pa que munchos usuarios y usuaries les repitan ensin filtru nengún – les afirmaciones más dañines y los bulos más descaraos. El diariu El Comercio publicaba va un mes escasu qu’hai actualmente 289 asturianes – que figuren nes cifres oficiales de siguimientu – en riesgu de sufrir una agresión machista “grave o letal”, de les que casi 30 son adolescentes. “Porque son tiempos de lobos y no nos podemos ir. Son tiempo de lobos y no quisimos huir”.