Encuesta sobre malestar docente (STEs-i)

(de stes.es)

El llabor d’enseñar nel nuesu país enfréntase a una complexidá creciente pola medría de la diversidá nes aules. Les estadístiques señalen que 1.131.816 estudiantes (el 14 % del total) presenten necesidaes específiques d’apoyu educativu, de los cualos el 3,6 % (292.897) esperimenten dificultaes graves. Ye crucial destacar que la escuela pública asume la inmensa mayoría d’esta realidá, escolarizando al 77 % d’esti alumnáu y al 80 % d’aquel que ta en situación de vulnerabilidá socioeconómica.

A pesar de la complexidá del entornu, el profesoráu atópase baxo una crítica constante per parte de l’Alministración y de los medios de comunicación. Dende los STEs, al traviés del contautu direutu col personal docente, detectamos una fonda preocupación por diversos factores que degraden la profesión, los cualos s’agrupen nes siguientes categoríes d’inquietúes que recueye esta encuesta: ofensiva privatizadora pa seleicionar al meyor alumnáu; falta de recursos materiales y d’espacios; enorme carga burocrática; ratios y hores llectives escesives; falta de conciliación familiar; un clima de trabayu conflictivu —llegando inclusive a agresiones verbales y físiques—; perda de poder adquisitivu, ente otros.

La escasez de profesoráu pa cubrir vacantes convirtióse nuna realidá alarmante. Col pasu de los años, la degradación de la profesión docente foi n’aumentu; una pesada carga de xeres alministratives, munches de les cualos nun correspuenden a la llabor docente, creó la “tormenta perfecta” que ta provocando un abandonu ensin precedentes nel sector.

Col fin de cuantificar d’una manera útil y fiable estes preocupaciones y disponer d’un diagnósticu precisu, llanzamos esta macroencuesta sobre l’estáu del profesoráu nes enseñances públiques non universitaries. L’oxetivu ye llograr datos que sirvan pa revalorizar la xera d’enseñar y ameyorar el respaldu que’l personal docente recibe de les families, de les alministraciones educatives y de la sociedá en xeneral.