El xantaxe de la evaluación del profesoráu

La ministra d’Educación participó nel Foru “Educar pal sieglu XXI. Desafíos y propuestes” y xeneró sorpresa ya indignación col anunciu que fizo nesi Foru de venceyar una parte de les retribuciones del profesoráu a que seyan evaluaos de forma voluntaria por axentes esternos. Llama l’atención que faiga esti tipu de propuestes ensin convocar la Mesa Sectorial d’Educación, únicu ámbitu de negociación por afectar esta propuesta a les condiciones llaborales del profesoráu. Nun dexa de resultar sorprendente que nos últimos años impúnxose el costume de facer los grandes anuncios en foros que nada tienen que ver colos ámbitos de negociación a los que pretende dexar vacíos de conteníu.

En SUATEA creemos que de les declaraciones de la ministra pue deducise que los problemes y faltes del sistema educativu son responsabilidá del profesoráu y que too sería meyor si los docentes fueren sometíos a evaluación.  Nesti sen, da a entender que’l profesoráu ye poco profesional y que naide-y pide cuentes sobre’l trabayu que desarrolla, dalgo absolutamente falso porque’l profesoráu, quiera que non, siempres ta sometíu a evaluación per aciu de les sos distintes actuaciones: les programaciones y el grau de cumplimientu d’elles a lo llargo de cada cursu, los resultaos d’evaluaciones del alumnáu, los informes, les memories de fin de cursu, etc.

Sin embargo, la Sra. Ministra paez escaecer y de fechu nun fai nin una sola referencia a cómo y en qué circunstancies tán trabayando los docentes, en particular tres los retayos de 2012, y cómo minaron les sos condiciones llaborales y la calidá del sistema educativu: xornaes llaborales interminables, ratios d’alumnu/a por aula inasumibles, medría de xeres burocrátiques, desapaición na práctica de programes educativos, mayores dificultaes pa la formación del profesoráu, l’atención a la diversidá so mínimos, amenorgamientu de les beques al alumnáu, y, por si fuera poco, nunca entren a reconocer los efeutos de la conxelación salarial a la que nos sometieron y la correspondiente perda de poder adquisitivu a lo llargo de los últimos diez años.

Fálennos d’evaluación voluntaria y resultamos chocante porque ¿Significa eso que quien nun acepte sometese a evaluación puede facer lo que quiera y naide va pidi-y que rinda cuentes pol trabayu que realiza? ¿O que quien nun se someta a la evaluación ye profesoráu de segunda clase? ¿Y en consecuencia va haber alumnáu que reciba una educación devaluada? Ye totalmente absurdo pensar asina y sábenlo bien porque’l sistema educativu yá tien los sos propios métodos de control y evaluación y nadie nun los pue eludir.

N’otru sentíu, quier venceyase la supuesta evaluación, que proponen que seya voluntaria, al cobru d’incentivos salariales. N’Asturies sabemos perbién lo que supunxo venceyar un complementu retributivo a la evaluación voluntaria del profesoráu, de fechu ye la única Comunidá en qu’hai una Llei d’Incentivos a la Evaluación del profesoráu. Dende SUATEA, como bien sabe’l profesoráu asturianu, manifestémonos dende’l primer momentu absolutamente en contra de la evaluación del profesoráu y de venceyala al  cobru d’incentivos salariales, porque marxinó a docentes que nun cumplíen los requisitos (ente otros, el profesoráu interín) y porque, amás, supón un sistema retributivu basáu na arbitrariedá, nel clientelismu y na consideranza de la función docente non como un trabayu n’equipu (condición inescusable) sinón como una competición na que podría asoceder qu’unos, los meyor vistos pola dirección del centru, pueden algamar xubíes salariales, pero quien seyan críticos o nun se plieguen a los sos dictaos pueden vese relegaos no profesional y salarial.

Dende SUATEA venimos denunciando dende va años que la Llei d’evaluación del profesoráu asturianu foi un chantaxe pa los docentes, pos supunxo venceyar la evaluación voluntaria al cobru d’un complementu salarial en llugar d’universalizar la homologación salarial al restu de CCAA, que sería lo esperable y lo más xusto. Ello ye que namás n’Asturies se plantega d’esta forma. Y too ello cola aquiescencia de dellos sindicatos que quixeron apuntase el tantu d’una pequeña medría salarial selectiva y discriminadora (dexó fuera’l profesoráu interín, al proviniente d’otros territorios, al que nun tuviera más de cinco años d’antigüedá nel cuerpu), ensin importa-yos lo que la evaluación supón de chantaxe pal profesoráu.

La nuesa obligación como sindicatu ye amosar los peligros que supón esta propuesta, que ye discriminatoria y potencialmente destructora de bona parte de les condiciones llaborales del profesoráu de les tovía esistentes. A lo que realmente aspiramos ye a recuperar un salariu dignu que nos arrampuñaron cola escusa de la crisis y pa ello nun precisamos nengún tipu d’evaluación voluntaria nin de xantaxe sinón un aumentu llinial ensin condiciones pa tol profesoráu.

Uviéu, 6-11-2018