El Plan de Competencia Dixital: otra chapuza más de la Conseyería

Son munches les quexes y el malestar del profesoráu asturianu pola manera de facer les coses de la Conseyería d’Educación no que se refier al Plan de Competencia Dixital. Lo primero ye nun saber qué pasa si nun algames la capacitación nin los plazos que tienes pa facelo. Lo segundo, la manera na que tán ufiertándose los cursos.

Ye evidente que volvemos ver como la Conseyería improvisa col únicu fin de salir del pasu como pueda. Hai una partida de fondos europeos qu’obliguen a cumplir unos obxetivos o “hitos”, ente los que tá que pa xunu del 2024 tenga la certificación de competencia dixital el 80% del profesoráu asturianu. Del restu poco más se sabe, y d’ehí vienen les prieses y el facelo de cualquier manera. 

La importancia de les tecnoloxíes nueves nel ámbitu de la enseñanza ye una realidá. Lo qu’echamos en falta ye una estratexa que tenga unos obxetivos claros y se dote de medios p’algamalos. Ye necesario formar al profesoráu pero non de cualquier manera: la formación tien que ser n’horariu llaboral y dotando a les persones responsables TIC del tiempu  y materiales necesarios.

Los problemes de la enseñanza pública nun se resuelven faciéndo les coses a la trágala nin enllenando los centros de pantalles que naide pidió nin considera una prioridá mientres nun s’atienden cuestiones básiques como la falta de docentes en munches especialidaes. 

Nun hai que permitir que’l procesu d’alfabetización dixital se desenvuelva ensin la dotación de personal necesaria que garantice una bona formación de los docentes. Tenemos la experiencia del procesu d’inclusión educativa, onde un añu sí y otru tamién, vemos cómo sigue ensin resolvese la falta de profesoráu de PT y AL, lo que afecta directamente a l’atención del alumnáu más vulnerable. Esta deficiencia nun tien que repetise en más ámbitos de la educación en xeneral nin de la formación del profesoráu en particular.