El Ministeriu d’Educación asegura qu’alvirtió a les comunidaes qu’esperen

Esta entrada está disponible en: Castellano (Castellanu)

EL MINISTERIU D’EDUCACIÓN ASEGURA QU’ALVIRTIERON A LES COMUNIDAES AUTÓNOMES QUE NUN REALICEN LES SOS CONVOCATORIES D’OPOSICIONES HASTA EL CAMBÉU DEL REAL DECRETU D’INGRESU

Sicasí, Asturies, Baleares y Navarra, que yá convocaron, tendrán de resolver los sos procesos d’oposición siguiendo’l modelu qu’agora se va a modificar.

La Confederación de STEs-i (de la que forma parti SUATEA), na Mesa Sectorial del Ministeriu de güei, esixó abrir una negociación real que dexe llegar a un consensu sobro los procesos selectivos y que respuenda a los intereses de los distintos colectivos.

Na xunta de la Mesa de Negociación convocada pal día de güei pol Ministeriu d’Educación pa valorar el cambéu del Real Decretu d’ingresu, accesos y alquisición de nueves especialidaes nos cuerpos docentes, los representantes ministeriales nun pudieron asegurar que los procesos a desenvolver a lo llargo del añu 2022 tengan un desenvolvimientu homoxéneu nes distintes Comunidaes Autónomes. Al aviesu, les Alministraciones que yá convocaron les sos oposiciones – Asturies, Baleares y Navarra- tendrán de resolvelos col Real Decretu anguaño a valir.

Tampoco foi capaz de responder a les múltiples duldes y demandes plantegaes pola nuesa organización y el restu de sindicatos presentes na Mesa al respective de los procesos a convocar llueu: tantu’l nuevu concursu-oposición, como’l concursu de méritos que’l Ministeriu plantega como adecuación al sector educativu de la llei de midíes urxentes pal amenorgamientu de la temporalidá nel empléu públicu que va entrar a valir nos próximos díes.

Fíxose-yos ver que’l procesu de estabilización por concursu de méritos tien de ser bien claro y que sirva realmente pa estabilizar al personal n’abusu de temporalidá, pos d’otra manera pueden surdir gran cantidá de demandes por persones que se vean agraviaes.

N’otru orde de coses, nun ye de recibu que se valore la esperiencia docente en centros privaos cuando’l personal n’abusu ye’l profesoráu de la enseñanza pública. Otra tema d’alderique foi la puntuación de la esperiencia docente, dende STEs-i defendemos que la esperiencia tien de ser la máxima nel baremu pal profesoráu interín.

La Confederación de STEs-i repitió nes sos intervenciones la necesidá d’un procesu de negociación pa buscar un consensu, tanto a nivel de Mesa Sectorial, como de Comunidaes Autónomes, pa consiguir qu’estos procesos selectivos supongan una solución real pal personal interino n’abusu de temporalidá y que, de la mesma, respuenda a los distintos intereses de los diversos colectivos.

Delles organizaciones sumáronse a esti pidimientu mientres otres dexaron patente, dende’l primer momentu, la so conformidá polos testos presentaos que “s’averen muncho” a los sos planteamientos, como sorrayó dalguna organización dende la so primer intervención.

N’otru orde de coses lo único tanxible de la xunta de güei ye’l compromisu del Ministeriu d’Educación de volver convocar esta Mesa de Negociación “con calter inmediatu” pa resolver el pasu del profesoráu que tien la titulación esixida del Cuerpu de Profesores Técnicos al Cuerpu de Secundaria, según establez la LOMLOE, aprobada agora va un añu.

Secretariáu de SUATEA y Secretariáu de STEs-intersindical
21 avientu de 2.021

Esta entrada está disponible en: Castellano (Castellanu)

Check Also

Asturies impón un programa de refuerzu en “lengua” y matemátiques

Esta entrada está disponible en: Castellano (Castellanu) Asturies impón un programa de refuerzu en “lengua” …