SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
Mientres los Conseyeros d’Educación del PSOE anuncien que nun van facer la reválida, el Conseyeru asturianu anecia con celebrala’l 15 de xunu.
El vienres 13 de mayu enantes de la Conferencia Sectorial d’Educación los Conseyeros d’Educación de las Comunidaes gobernaes pol PSOE decidieron amosar que taben mal agusto cola actitú del Ministru Méndez de Vigo respecto a les reválides LOMCE y esixeron la so retirada pal cursu que vien.
No tocante a les reválides de 6º de Primaria, que les autonomíes del PP tán celebrando nesti mes contra la opinión de la comunidad educativa, los Conseyeros del PSOE recalcaron que diben facer una evaluación individualizada del alumnáu basada na evaluación continua. Pa ello, según indicó la Conseyera d’Aragón que fixo de vocera de los demás conseyeros, diben mandase unes instrucciones a los centros pa que, a partir de la evaluación ordinaria del alumnu o alumna, s’apañe información sobre les competencies que se van a evaluar. Esta información unviaríase a una comisión externa formada, ente otros, pola Inspección educativa que sería la encargada de facer los informes que depués se mandaríen a les families.
El Conseyeru d’Educación d’Asturias fixo, delantre de los medios de comunicación en Madrid declaraciones contra les reválides y el so calter segregador. Llamentablemente, eses declaraciones contienen una contradicción que tien que s’esclariar darréu. Mentres les demás CCAA gobernaes pol PSOE decidieron nun facer pàsar al alumnáu per unes prebes que xeneren ansiedá y que busquen estigmatizalu y clasificar a los centros, n’Asturies sigue manteniéndose en palabres del nuestru Conseyeru la realización de la reválida a neños y neñes el 15 de xunu.
Esta selmana, na comunidá vecina de Galicia, celebráronse les prebes de la reválida de 6º que foron boicoteaes masívamente poles families, con incidentes en dellos centros onde les madres y padres negáronse a llevar a les prebes a los sos fíos y fíes reivindicando’l derechu del alumnáu a asistir al centru con actividaes normales.
Alcordámonos de les alvertencies del Conseyeru na prensa asturiana a les families que nun tienen intención de mandar a los fíos a la reválida: Dicía Xenaro Alonso que les reválides son obligatories y que’l que nun la fixere’l día 15 tendría que la facer el primer día que volvieran a clase. Yera bono saber si’l Conseyeru informaría a los sos colegues de la so intención de realizar una preba presencial al alumnáu que yá llevantó’l la opinión en contra de la comunidá educativa asturiana.
Naide informó a los centros educativos de la realización de la reválida. Nun se recibió comunicación neneguna, si nun ye pelos medios de comunicación. El profesoráu alcuéntrase nuna situación de nun saber, ensin ser quien a contestar a les preguntes de les families y del propiu alumnáu, que, d’equí a un mes, nun saben si van tener qu’enfrentase a una preba final.
Dende SUATEA pidimos una moratoria na aplicación de la LOMCE como va facer por exemplu’l País Vascu, que nun la va facer esti cursu. Sicasí, nun se ye a entender qué gana’l Conseyeru d’Educación faciendo pàsar al alumnáu, al profesoráu y a les families per una situación como ésta habiendo otres posibilidaes como les qu’anunciaron les demás CCAA.
Secretariáu d’Asturies de SUATEA
UVIÉU 14 /05/2016
Esta entrada está disponible en: Castellano (Castellanu)
