El CEPA del Nalón (Samartín del Rei Aurelio), ensin calefacción dende ochobre

Esta entrada está disponible en: Castellano (Castellanu)

Dende’l SUATEA queremos denunciar la situación que tan viviendo esti iviernu l’alumnáu y el profesoráu del Centru d’Educación de Persones Adultes (CEPA) del Nalón, en Samartín del Rei Aurelio, por falta de calefacción, y que fai que la mayoría de los díes tengan que tar en clase con una temperatura alredor de los 10ºC.

Esta ye una situación recurrente nel centru. La cronoloxía ye la siguiente: el procesu de reclamación per parte del CEPA entamó’l 17 d’ochobre, na reunión col alcalde de Samartín del Rei Aurelio, la conceyala d’Educación y les direcciones de los centros del conceyu, onde se solicitó al consistoriu que contactara cola empresa encargada del caltenimientu de la caldera (Uría Calefacción) pa que la ponga a puntu y la prenda. El 24 d’ochobre comunicóse-y a la conceyala d’Educación que’l silu de los pellets taba vacíu y apuraba recargálu.

El 6 de payares el centru contactó otra vez cola conceyala pa conocer cómo taba la recarga del silu, la revisión de la caldera y la prendedera. Hasta esa fecha nun se ficiera nada. El día 8 d’esi mes finalmente fízose la carga y el día 12 la empresa echó a andar la caldera, pero esi mesmu día l’equipamientu dio’l primer fallu. Al día siguente asocedieron otros dos fallos. El día 13 de payares el CEPA contactó cola empresa y con la conceyala p’avisar de los problemes a dambes partes, y el día 14 informóse al centru de que yera necesariu cambiar un ventilador pa que funcionara la caldera. A lo último, la empresa comunicó que, pa poder solucionar los problemes definitivamente, yera necesariu camudar la caldera, al llegar al final de la so vida útil.

La realidá actual del CEPA del Nalón ye que’l personal ta viéndose obligáu a utilizar calefactores eléctricos pa calecer les instalaciones. Por si fuera poco, esto tien les sos limitaciones, porque les sobrecargues faen que salten los automáticos y nun puedan usase los calefactores munchu tiempu siguíu.

Dende’l SUATEA yá punximos estes incidencies en conocencia del Serviciu de Prevención de Riesgos Llaborales del Principáu, y esiximos al Conceyu de S.R.A. que se ponga manes a la obra pa solucionar la situación, yá que ye la so competencia. Si la empresa encamienta camudar la caldera, debería de faese ensin más dilación. Paeznos intolerable que pueda tenese más de trés meses a profesoráu y alumnáu pasando fríu y nunes condiciones indignes.

Esta entrada está disponible en: Castellano (Castellanu)

Check Also

Nota informativa: sentencia sobre xefatures de departamentu

Esta entrada está disponible en: Castellano (Castellanu) El profesoráu qu’exerza la xefatura de departamentu y …