Esta entrada está disponible en: Castellano (Castellanu)
Ayeri la Conseyería d’Educación presentó lo que lllamen “Plan de meyora de les direcciones unipersonales”, pensamos que con esto quieren iguar un problema que’l SUATEA lleva años denunciando: les direcciones que lleva una sola persona tán atacaes de trabayu, y la normativa autonómica namás-yos permite dedicar 5 hores selmanales del so horariu al llabor de dirección, que nos casos de les unipersonales inclúin tamién funciones de xestión económica (que, en centros grandes, realiza una secretaria o secretariu).
Tamos ablucaos coles 5 midíes que se proponen. la primera y la segunda tán totalmente vacíes de conteníu; la cuarta supón lliberaciones horaries pero a cuenta d’asumir programes (esto ye, más trabayu), y la quinta pue ser entendida, y asina nos lo tresllada dalgún de los afectaos, como una crítica al llabor actual de les direcciones unipersonales Lo cierto ye que propónse formación pa estos docentes, suponemos que porque los responsables de la Conseyería interpreten que’l llabor que tán desenvolviendo anguaño ye ameyorable. En resume, namás una d’eses cinco midíes, la que promete amenorgar los horarios, respuende a les necesidaes reales que nos tresmiten estes direcciones, y nin siquiera tenemos la seguranza de que se vaiga a aplicar.
Amás, anúnciase que “se tien intención” d’echar a andar estes midíes “a partir del próximu cursu”. Esto ye, que nin siquiera se garantiza que vaiga facese, quedando nuna intención. Esto últimu cónstanos que ye la reclamación fundamental del grupu de directores que s’atopen nesta situación: que s’escuchen les sos suxerencies y se propongan midíes afitaes no que precisen de verdá, pero sobremanera, que la so implantación tenga calter inmediatu y nun se retrase más allá del cursu que vien.
Dende’l SUATEA queremos proponer, de primeres, que na midida que se refier a la mengua horaria pa les direcciones se blinde la posibilidá de dedicar diez hores selmanales, y se quiten los condicionantes rellacionaos cola “disponibilidá horaria”. La realidá ye qu’estes y estos docentes lleven años dedicando munches hores fuera de lo que tenía que ser el so horariu llaboral, y taba bien que los sos responsables empatizaren con esta situación y aceptaren ensin dar vueltes esti compromisu tan cenciellu.
A lo cabero, nun sobraba aprovechar esti momentu p’actualizar los complementos retributivos y los salarios de los docentes que, polo xeneral, lleven años per debaxo d’onde tendríen de tar teniendo en cuenta la inflación acumulada nos últimos años.
Esta entrada está disponible en: Castellano (Castellanu)