Día mundial del y la docente

El día 5 d’ochobre celébrase’l Día Mundial del y la Docente y esti añu queremos visibilizar la importancia que tien esti llabor – un oficiu feminizáu, sobremanera nes primeres etapes de la enseñanza – pa la sociedá y la infancia.

Según datos del últimu Informe del Conseyu Escolar del Estáu, nel cursu 2022-2023 la presencia relativa de muyeres nel profesoráu qu’imparte Enseñances de Réxime Xeneral foi mayor que’l de los homes, sobremanera nos niveles d’Educación Infantil y Primaria (84,1%) y Educación Especial (83,3%). Polo que respecta a Educación Secundaria, la proporción de muyeres foi del 59,8%.

Los datos indiquen que nes etapes iniciales son sobremanera les muyeres les encargaes de poner les bases d’un bon deprendimientu y desenvolvimientu. Tovía asina, y d’una manera especial les nueses compañeres de la etapa 0-3, estes profesionales sufren una situación de precariedá llaboral, con salarios que nun se correspuenden cola so formación y responsabilidá y contratos parciales, amás de les dobles xornaes llaborales que les muyeres realicen, si tenemos en cuenta’l llabor de cuidaos que desempeñen na so vida personal.

Por esti motivu’l día del personal docente queremos reivindicar la importancia d’unes condiciones llaborales y salarios dignos pal desenvolvimientu del oficiu, y tamién que les meyores y cambeos nel ámbitu profesional se faigan dende una perspectiva feminista.

Nesti día tamién tenemos d’agradecer la mirada coeducativa que munchos docentes apurren ya implementen nes escueles: un llabor imprescindible dende los centros ya instituciones para construyir una educación llibre d’androcentrismo y machismu, asina como formar al alumnáu nunes relaciones xustes basaes na igualdá y el respetu.

Los y les docentes son pegollos fundamentales en cualquier sociedá. Dende la educación primaria hasta niveles cimeros, son los responsables de formar a les nueves xeneraciones. Nun ye desaxerao dicir que’l futuru de la sociedá depende, en gran manera, de la cualidá del profesoráu.

La pedagoga y xeógrafa menorquina Pilar Benejam reflexonaba sobro’l papel de la escuela na sociedá y les sos estructures, lo mesmo que de les posibilidaes (de vivir, de funcionar…) qu’ufierta la conocencia de la redolada, cercana y global. Dicía: “La escuela nun ye namás una institución de la democracia, sinón tamién la so condición de posibilidá. Nun hai democracia ensin les conocencies que permiten entender el mundu”.

A lo último, amestámonos a la campaña estatal de la Confederación de STEs col lema “Pola pública, creamos escuela”.