Día Internacional de Tolerancia Cero cola Mutilación Xenital Femenina 

6 de febreru: Día Internacional de Tolerancia Cero cola Mutilación Xenital Femenina

En 2012 l’Asamblea Xeneral de Naciones Xuníes designa’l 6 de febreru como’l Día Internacional de Tolerancia Cero pa cola Mutilación Xenital Femenina,  col oxetivu d’ampliar los esfuerzos internacionales pal abandonu de la práctica. L’Asamblea fixo una llamada a los estaos y sociedá civil para siguir celebrando esi día, intensificando les campañes de concienciación.

Esti día de llucha tien el so antecedente nel 6 de febreru de 2003, cuando Stella Obasanjo, primer dama de Nixeria y vocera d’una campaña contra la práctica, realizó una declaración oficial sobro “Tolerancia Cero cola Mutilación Xenital Femenina” n’África, mientres la conferencia liderada pol Comité Interafricanu en Práctiques Tradicionales qu’afecten a la Salú de Muyeres y Neñes.

La mutilación xenital femenina entiende tolos procedimientos consistentes na eliminación parcial o total de los xenitales esternos femeninos, asina como otres mancadures causaes a los órganos xenitales femeninos por motivos non médicos. Esta práctica nun brinda nengún beneficiu pa la salú y puede causar hemorraxes graves, problemes urinarios y, al llargu plazu, duviesos, dificultaes menstruales, infecciones, complicaciones nel partu y un mayor riesgu de mortalidá neonatal.

La práctica de la mutilación xenital femenina casi siempres se practica a menores, en dalgún momentu ente la lactancia y los 15 años. Ta considerada internacionalmente como una violación de los derechos humanos de les muyeres y les neñes, reflexa una desigualdá ente los sexos bien enraigonada, y constitúi una forma estrema de discriminación. Amás, viola los derechos a la salú, la seguridá y la integridá física, el derechu a nun ser sometíu a tortures y tratos crueles, inhumanos o degradantes, y el derechu a la vida nos casos en que’l procedimientu acaba provocando la muerte. En munchos llugares, hai datos qu’indiquen que los trabayadores de la salú tán realizando esta práctica de forma creciente por cuenta de la creencia errónea de que ye más segura si se realiza en condiciones medicalizaes. La OMS encamienta encarecidamente a estos trabayadores a que nun practiquen la mutilación xenital femenina y ellaboró una estratexa mundial y materiales específicos pa emprestar sofitu al sector y a los trabayadores de la salú con oxetu de poner fin a la medicalización d’esta práctica.

Según la información llograda en 30 países onde se realiza esta práctica de les rexones occidental, oriental y nororiental d’África, y en dellos países del Oriente Mediu y Asia, más de 300 millones de neñes y muyeres vives na actualidá sufriéronla, y calcúlase que más de 4 millones de neñes cuerren el riesgu de ser sometíes a ella cada añu. A consecuencia d’ello, ye motivu d’esmolición en tol mundu.

Factores d’orde cultural y social son los que lleven a practicar la mutilación xenital femenina. Los motivos polos que se practica difieren en función de la rexón y la dómina, y respuenden a un amiestu de factores socioculturales enraigonaos nes families o les comunidaes. Ellí onde ye una convención o norma social, la presión de la sociedá por que l’individuu obre como lo faen y veníen faciendo los demás, según la necesidá d’aceptación social y la medrana al refugu de la comunidá, constitúin poderoses motivaciones pa perpetuar esta práctica. La mutilación xenital femenina considérase davezu parte necesaria de la crianza de la neña y una forma de preparar pa la vida adulta y el matrimoniu, que puede incluyir el control de la so sexualidá p’asegurase de la so virxinidá antes del matrimoniu y la so fidelidá dempués d’él.

Anque nun hai testos sagraos que prescriban la mutilación xenital femenina, hai quien creen qu’hai una motivación relixosa. Los líderes relixosos adopten distintes posiciones pa con esta práctica y dalgunos d’ellos tán contribuyendo a que s’abandone.

Trátase, por tanto, d’un problema que tresciende’l marcu puramente asistencial. Nél, conflúin la vulneración de derechos humanos, la necesidá d’un abordaxe intercultural de cuestiones amestaes a la intimidá ya identidá de les persones, y el compromisu moral d’evitar práctiques tradicionales qu’impliquen un tratu discriminatoriu, violentu, degradante y doliosu de les muyeres.

Amás, colos movimientos migratorios, lo qu’un día foi llocal, güei ye global, y la práctica ta en diáspora a nivel mundial (Europa, Estaos Xuníos d’América, Australia, ente otros). El pesu demográficu de la población migrante subsahariana n’España, con altes tases de masculinidá que favorecen les reagrupaciones familiares, xuníes a una elevada tasa de fecundidá de les muyeres africanes, supón agora una fuerte medría nes nueses consultes y escueles, de neñes en riesgu de ser sometíes a una MGF. Pa los y les profesionales d’atención primaria, esto supunxo descubrir realidaes culturales distintes y encarar nuevos retos asistenciales, nel marcu de complexos procesos d’aculturación ya integración social.

Dende la OM queremos denunciar qu’esta violación de los derechos humanos nun tien cabida nel sieglu XXI. Ye hora d’actuar.

Al traviés de la meta, incluyida nos Oxetivos de Desenvolvimientu Sostenible, d’esaniciar les práctiques nocives, la Comunidá Internacional comprometióse a erradicar la mutilación xenital femenina pa 2030. Sicasí, p’algamar esta meta, el progresu tien de ser 27 vegaes más rápidu qu’el de la última década. Esto esixe una acción urxente y coordinada a una escala ensin precedentes. 

Con esi envís, ye preciso facer parte a les comunidaes y les organizaciones llocales y trabayar colos líderes tradicionales y relixosos y los dirixentes políticos, formar a los profesionales de la salú y concenciar sobro los perxuicios d’esta práctica. Reforzar les aliances ente líderes, organizaciones comuñales y sectores —como’l de la salú, la educación y la protección social—, asina como siguir defendiendo ininterrumpidamente los derechos y ampliar los movimientos sociales, poniendo a les neñes y les sobrevivientes nel centru. Sigue resultando imprescindible sofitar a les sobrevivientes de la mutilación xenital femenina porque munches sufren efectos físicos y psicolóxicos al llargu plazu y requieren atención médica y psicolóxica integral pa sanar les feríes causaes por esta nociva práctica.

Por too ello, dende la OM reclamamos una mayor rindición de cuentes a tolos niveles, pa garantizar que se respeten los compromisos colos derechos humanos y que s’apliquen polítiques y estratexes pa protexer a les neñes en situación de riesgu y apurrir atención —incluyíos servicios xurídicos— a les sobrevivientes. Tamién esiximos mayor inversión p’ampliar aquelles intervenciones que la so eficacia yá foi demostrada.

Toles persones tenemos un papel que desempeñar a la de garantizar que toles neñes tean protexíes y puedan vivir ensin sufrir daños. Aceleremos el ritmu y actuemos de forma urxente. Llegó’l momentu d’acabar cola mutilación xenital femenina.