Día Internacional de la Llingua Materna

Güei día 21 de febreru, como tolos años nesta fecha dende l’añu 2000, celebramos el Día Internacional de la Llingua Materna.  Con elli conmemoramos l’asesinatu por disparos policiales de tres mozos estudiantes que se manifestaben esti día, nel añu 1952, en Bangladesh, reivindicando la oficialidá del idioma bengalí.

La UNESCO, como institución creadora y pomotora d’esta fecha, cree na importancia del respetu a la diversidá cultural y llingüística de les sociedaes pa qu’estes convivan en paz y se caltengan nel tiempu. Ye por ello polo que trabaya por caltener les diferencies de cultures ya idiomes que fomenten la tolerancia y el respetu de los demás.

Sabemos que la diversidá llingüística vese cada vez más amenaciada con un mayor númberu de llingües que desapaecen. Calcúlase qu’hai cerca de 7000 llingües nel mundu y que cada dos selmanes esaníciase una, arramplando la so desapaición con tou un patrimoniu cultural ya intelectual. Les nuestres llingües tán dientro del grupu de les amenazaes d’esaniciu, lo mesmo qu’otres munches d’elles, especialmente les indíxenes.  Esti añu ta dedidáu a elles.

Los estremaos pueblos del mundu y les sociedaes multiculturales y multillingües sobreviven gracies a que les sos llingües tresmiten les sos conocencies y cultures tradicionales. Poro, ye fundamental pal caltenimientu de los pueblos, les cultures y les sociedaes, una educación plurillingüe dende edaes tempranes y la normalización social de los sos idiomes nun clima de tolerancia y respetu de la diversidá.

Dende SUATEA queremos conmemorar esti día solidarízandomos coles llingües indíxenes y reivindicando pal asturianu y gallego-asturianu: ¡OFICIALIDÁ YÁ!  ¡OFICIALIDÁ XA!

El secretariáu de SUATEA

Uviéu, 21 de febreru de 2019