Día Internacional de la Llingua Materna 2025

Tolos 21 de febreru, el planeta celebra’l Día Internacional de la Llingua Materna. Esta fecha declaróla la UNESCO en 1999 col envís de protexer y promover la diversidá cultural y el multillingüismu. La importancia que tienen les llingües maternes débese a que son el primer instrumentu de comunicación y aprendizaxe que tenemos les persones. Amás, per aciu d’elles inxertámosmos nes tradiciones, na historia, nes creencies y na identidá cultural en xeneral de la comunidá na que nacimos.

Sicasí, munches d’estes llingües tán en peligru d’esaniciu por tar en contactu con otres muncho más potentes qu’invaden y uniformicen los territorios o ámbitos sociales onde les maternes se desenvolvíen convirtiéndes en minorizaes. Les causes d’esa invasión hai que poneles nel devenir históricu, económicu y demográficu de los paises o comunidaes falantes d’eses llingües llamaes mayoritaries o globales, que cuenten con tolos medios materiales y económicos pal so espardimientu al traviés de los medios de comunicación, la escuela y les tecnoloxíes de la información y comunicación.

La sobrevivencia de les llingües y el so espardimientu non solo ye cuestión de la voluntá de los sos falantes, sinón que en mayor midida dependen de factores sociales, políticos y económicos de les comunidaes culturales nes que se desenvuelven.

Según la UNESCO, cada dos selmanes esaníciase una llingua nel mundu, lo que significa la perda non solo de palabres, sinón tamién de conocencies, cosmovisiones y tradiciones ancestrales. Por ello, esti día busca xenerar conciencia sobre la importancia de caltener les llingües orixinaries y fomentar la educación na llingua materna dende la neñez.

Esti añu 2025, la UNESCO escoyó como lema de la so celebración esti: “Tecnoloxía y Educación: Innovación pa la Preservación Llingüística”. Asina quier destacar el papel de les nueves tecnoloxíes na enseñanza, la comunicación, la documentación na conservación y espardimientu de les llingües minorizaes en peligru d’esapaición. Anguaño ye esencial cuntar colos ordenadores, teléfonos móviles, tablets, plataformes dixitales y los recursos ufiertaos pola intelixencia dixital pa facilitar la tresmisión y aprendizaxe de los nuestros idiomes maternos nun mundu globalizáu y cada vez más tecnóloxicu.

La dixitalización y los medios dixitales constituyen agora un recursu esencial na documentación, enseñanza y tresmisión de les nuestres llingües pola facilidá na ellaboración de conteníos, na tresmisión d’eventos musicales, charres; na traducción automática d’otres llingues de testos orales y escritos; na creación d’aplicaciones y plataformes educatives pa la so enseñanza o facilitación de la comunicación interpersonal, asina como la disponibilidá que tenemos de sistemes operativos gratuitos nes nuetres llingües propies.

Nesti Día Internacional de la Llingua Materna tenemos de celebrar que n’Asturies, magar de les torgues históriques sufríes poles nuestres llingües maternes, l’asturianu y gallego-asturiano siguen vives nun mundu cada vez más uniforme, calteniendo la singularidá ya identidá cultural asturiana nun mundu cada vez más globalizáu.