Día Internacional d’acción pola salú de les muyeres

DÍA INTERNACIONAL D‘ACCIÓN POLA SALÚ DE LES MUYERES

Dende fai más de trés décades, afitóse’l 28 de mayu como Día Internacional d’Acción pola Salú de la Muyer.

La AMS (Asociación de Muyeres pa la Salú) comprobó que’l sistema médicu tradicional resulta insuficiente y poco efectivu pa les muyeres porque ta basáu en parámetros androcéntricos masculinos consideraos “tipu” que nun tienen en cuenta cómo inflúi na salú’l factor de xéneru. La AMS denuncia tamién que’l sistema nacional de salú ufierta sobre too sicofármacos y analxésicos para solliviar el malestar, ensin afondar o buscar soluciones alternatives dende una perspectiva psicosocial de xéneru. La resultancia ye que se consigue aselar o amazcarar los síntomes ensin encetar el raigañu del problema y, polo tanto, ensin apurrir una solución durable. Un exemplu paradigmáticu ye’l diagnósticu que se fai de l’anxina de pechu: muches muyeres que sufren esta afección nun son diagnosticaes nin consecuentemente trataes, porque los sos síntomes pasen desapercibíos al diferir de la presentación clásica, esto ye, la masculina, que la so sintomatoloxía ye de va muncho conocida y reconocida.

¿De qué manera nos afecta a la salú de les muyeres el mandatu de xéneru?

• La educación emocional que recibimos desque nacemos, cuando ta basada en creencies que responsabilicen a la muyer del cuidu de los demás y la culpabilicen nel casu de nun cumplir afechiscamente esa “la so misión na vida”, fai apaecer emociones negatives como’l mieu y la vergoña que nos causen problemes de salú mental y física.
• Les muyeres sufrimos una presión tarrecible sobre los nuesos cuerpos. La imposición patriarcal sobre’l modelu de guapura afara autoestimes y esgasta la salú les muyeres nuna llucha constante por algamar el cuerpu ideal.
• Desque nacemos podemos ver ondequiera sistemes de dominación masculina y sumisión femenina qu‘interiorizamos con naturalidá y permiten que se tresmitan a la siguiente xeneración.

Contra esta construcción del xéneru femenín que nos prime y mos enferma ye más necesario que nunca encetar l’alfabetización feminista; una coeducación que dote de les ferramientes necesaries pa detectar les consecuencies d’esa construcción de xéneru impuesta por una socialización sexista, coles sos rellaciones de subordinación que xustifiquen les violencies, xeneren culpes y provoquen enfermedaes que solo carecen les muyeres.

“La construcción del xéneru femenín[…] torga la construcción de l’autonomía personal, del YO individual, el sentíu propiu de la vida, que ye esencial pa la salú integral y pal bienestar de cualesquier ser humanu” (Marcela Lagarde, 2005, en Claves feministes pa les mios socies de la vida).

28 de mayu de 2019

Secretaría de la Muyer de SUATEA
Organización de Muyeres de la Confederación Intersindical