Dia Internacional contra la mutilación xenital femenina

Sigún la OMS, la Mutilación Xenital Femenina ye reconocida internacionalmente como una violación de los derechos humanos de les muyeres y neñes. Espeya una desigualdá ente los sexos mui enraigonada, y constitúi una forma estrema de discriminación de la muyer. Ye practicada casi siempre en menores y constitúi una violación de los derechos de la infancia. Asinamesmo, viola los derechos a la salú, a la seguranza y la integridá física, el derechu a nun ser sometíu a tortures y tratos crueles, inhumanos o degradantes, y el derechu a la vida nos casos en que’l procedimientu acaba produciendo la muerte.

Nel mundu hai unos 140 millones de muyeres y neñes que sufren les consecuencies de la MXF. Calcúlase que n’África sometieron a MXF a alredol de 92 millones de neñes de 10 años o más. Estes práctiques son más frecuentes nes rexones occidental, oriental y nororiental d’África, en dellos países d’Asia y del Oriente Mediu.

Por too ello, güei Día Internacional Contra la Mutilación Xenital Femenina, queremos amosar el nuestru más absolutu refugu énte ésta práctica, que non sólo vien faciéndose nestos países, sinón tamién dientro del estáu español. Sigún un estudiu fechu pola fundación Wassu-UAB presentáu na so edición del Mapa de Mutilación Xenital Femenina del 2012, n’España, 17.000 neñes menores de 15 años, procedentes de families africanes, tán en riesgu. Cataluña concentra’l 36,6% del total d’estes xóvenes, con más de 6.000 moces en situación de riesgu, unes 2.000 más qu’en 2008, mientres que’l conceyu español con más muyeres menores procedentes de países onde se practica MXF ye Zaragoza, con 818 en riesgu de padecela. Pa facer la mutilación d’estes menores suelen aprovechar el periodu vacacional que pasen nos sos países d’orixe, yá que nel estáu español ye illegal, siendo delitu penáu con hasta 12 años de prisión. Asina, nesti sentíu fáise a les neñes victimas tanto de la tradición como de la llei. Yá que con un programa curiosu de prevención dende les polítiques sociales, sanitaries y educativas, éstes práctiques podríen menguar.

El 27 de payares del 2011, l’Asamblea Xeneral de la ONU aprobó por primer vez una resolución que condergaba la MXF, desixendo a los estaos miembros la so prohibición y castigu, al considerar que ye “un atropellu irreparable e irreversible que niega los derechos humanos de les muyeres y les neñes”, amás de recordar que supón “una amenaza pa la salú mental, sexual y reproductiva de les muyeres y pue incrementar la so vulnerabilidá al VIH”.

Los esfuerzos p’acabar cola MXF tienen que centrase nel trabayu coles comunidaes y nel cambiu de les polítiques públiques. Ye un problema qu’hai qu’atayar al traviés de los ámbitos sanitarios, educativos, financieros y feministes.

Dende la Organización de Muyeres de SUATEA vamos siguir desixendo a los estaos el cumplimientu de les normatives internacionales, amás de denunciando cualesquier crueldá y desigualdá pa coles muyeres, pa llegar a algamar un mundu más xustu para toes nós.

Uviéu 6 de febreru de 2014.

Organización de Muyeres de SUATEA