Día d’aición global pol albuertu libre y seguru

¡NOSOTRES DECIDIMOS!

Más de 39000 muyeres muerren añalmente nel mundu  por causa d’albuertos clandestinos y cientos de miles sufren consecuencies pa tola vida según la Organización Mundial de la Salú. Amnistía Internacional y otros organismos especializaos constataron que, independientemente de cual sía’l marcu llegal del so país de residencia, les muyeres recurrimos al albuertu en proporciones similares y que la IVE (interrupción voluntaria del embaranzu) sía llegal o non solo incide nel riesgu qu’esta práctica trai pa la nuestra salú.

N’España, una llei de salú sexual  y reproductiva de 2010, modificada y ampliada en 2023 garantiza formalmente sobro’l papel que les españoles tienen derechu a albortar y a facelo según los criterios de gratuidá, accesibilidá y proximidá que les alministraciones competentes tán obligaes a facilitanos. Sicasí, la realidá ye que solo un 15% de los albuertos que se realizaron l’añu pasáu nel nuestru país fueron n’hospitales públicos y que la IVE nun se normalizó entá como una prestación sanitaria a la que cualquier muyer tien derechu nos supuestos que recueye la llei. Los sectores más reaccionarios de la nuesa sociedá trabayen ensin posa pa intervenir colos sos dogmes y la so moral particular la esfera de lo público cívicu y universal, y non solo torguen l’accesu a un derechu de les muyeres respaldáu por una llei democrática, sinón qu’inclusive lleguen a paralu n’ocasiones.

La oxeción de conciencia médica y en consecuencia la falta de profesionales médicos ye la escusa qu’anguaño aleguen gobiernos autonómicos p’amazcarar la so desdexación de funciones, la so neglixencia nel cumplimientu de la llei y el so sabotaxe descaráu a la nuestra democracia. Ye un motivu ideolóxicu, la resistencia fundamental a que les muyeres decidamos por nós mesmes sobro’l nuesu cuerpu y la nuesa sexualidá, la causa principal de que solo en cinco comunidaes autónomes esistan anguaño protocolos  reguladores de la oxeción de conciencia médica y de qu’en doce provincies nun se realicen interrupciones voluntaries del embaranzu, obligando a les muyeres d’estos territorios a asumir desplazamientos de cientos de kilómetros nuna situación d’especial vulnerabilidá personal y social.

Detrás de los estigmes, tabúes y silencios qu’en plenu sieglu XXI inda arrodien el derechu al albuertu lo qu’asoma ye unu de los espectros más tarrecibles del patriarcáu y la columna fundamental de la misoxinia: el mieu a la muyer llibre, independiente y capaz d’asumir ensin tutela masculina les riendes de la so sexualidá y la so  propia vida. Comprobemos apocayá en Polonia y USA qu’en cuanto los misóxinos aporten al poder una de les sos principales xeres ye torgar el derechu al albuertu de les muyeres.

Por eso’l derechu a un albuertu llibre, seguru y na sanidá pública ye una de les exes fundamentales de la llucha feminista y, ensin duda, una de les pruebes más evidentes de la fortaleza d’una democracia.

NOSOTRES DECIDIMOS