Día d’Acción Global pal Accesu al Albuertu Llegal y Seguru

El 28 de setiembre conmemórase’l Día d’Acción Global pal Accesu al Albuertu Llegal y Seguru, un día nel que se refuerza’l compromisu de lluchar polos derechos sexuales y reproductivos de les muyeres. 

Dientro de los derechos sexuales inclúise’l derechu al albuertu seguru y llibre. L’albuertu tovía ye fuertemente restrinxíu en munchos países, con repercusiones graves pa la salú y la vida de les muyeres. 

No que cinca al Estáu español, la historia de la llegalización del albuertu foi complexa ya foi evolucionando col tiempu. 

1. 1936-37- Despenalización de la práutica del albuertu: El 25 d’avientu de 1936, Cataluña, llegaliza l’albuertu llibre nes 12 primeres selmanes d’embarazu pentemedies del decretu firmáu por Josep Tarradellas y publicáu el 9 de xineru de 1937 nel DOGC (nº 9). [7][8][9]. Nes cones lleales a la República durante la Guerra Civil Española, siendo ministra de sanidá la cenetista Federica Montseny (payares de 1936 hasta mayu de 1937) el gobierrnu presidíu por Largo Caballero, despenalizó la práutica del albuertu inducíu en 1937, pero tuvo vixente mui poco tiempu, hasta que ganó’l bandu fascista dirixíu pol dictador Franco. 
2. 1985 – Despenalización parcial: cola Llei Orgánica 9/1985, despenalizóse parcialmente l’albuertu, permitiéndose en tres supuestos: peligru pa la salú física o psíquica de la ma, violación (hasta les 12 selmanes) y malformación fetal (hasta les 22 selmanes)
3. 2010 – Reforma de la llei: L’añu 2010, aprobóse la Llei de Salú Sexual y Reproductiva y d’Interrupción Voluntaria del Embarazu, que foi un gran adelantu. Esta llei permite l’albuertu llibre hasta les 14 selmanes de xestación y hasta les 22 selmanes en casos de riesgu pa la salú de la ma o anomalíes graves nel fetu. 
4. 2014 – Intentu de reforma restrictiva: el gobiertu español propuso una reforma restrictiva pa llendar l’accesu al albuertu namás en casos de violación o riesgu grave pa la salú de la ma, pero esta propuesta foi retirada pola gran oposición social.
5. Situación actual: Anguaño, l’albuertu ye llegal n’España según los términos afitaos pola llei de 2010, pero entá hai barreres d’accesu, como la falta de disponibilidá en delles rexones o’l refugu de profesionales sanitarios a prauticar albuertos por oxeción de conciencia. 

La llucha polos derechos sexuales y reproductivos, incluyendo l’albuertu seguru, entá ye una prioridá pa munchos coleutivos feministes y de derechos humanos a nivel global y local. 

Sicasí, hai manifestaciones a la escontra especialmente sofitaes por sectores conservadores y relixosos. Va poco, en Castelló, el propiu arzobispu de la ciudá participó nuna campaña escontra l’albuertu ente una clínica na que se realicen interrupciones voluntaries del embarazu. Estes acciones, que suelen tar acompañaes por oraciones coleutives o manifestaciones “provida”, busquen inluyir na opinión pública y presionar a les instituciones pa revertir o restrinxir el derechu a l’albuertu. 

Estes acciones a menudu xeneren polémica al considerase que presionen a les muyeres qu’acceden a estos servicios médicos nun momentu difícil y vulnerabilizales. Esti tipu de concentraciones ente les clíniques son criticaes polos coleutivos feministes y defensores de los derechos reproductivos, que consideren que suponen una forma d’acosu y coacción moral a les muyeres. 

Nesti casu en concretu, la participación del arzobispu ye un reflexu del papel activu qu’algunos líderes relixosos tienen nesti debate, anque la llegalidá del albuertu n’España ta protexida pola llei. 

Munchos defensores de los derechos sexuales y reproductivos piden estremar claramente ente les creencies relixoses y les polítiques públiques, insistiendo que les decisiones col albuertu tienen que ser namás de les muyeres, ensín más interferencia.

A pesar de los adelantos en derechos humanos y igualdá, entá vivimos nun contextu global nel que los derechos sexuales y reproductivos de les muyeres son vulneraos sistemáticamente. En metá del sieglu XXI, la discriminación, la esclusión, les amenaces de castigu físicu, prisión o otres formes de represión siguen siendo una realidá en munches partes del mundu colles muyeres. estes práctiques son un reflexu de sistemes patriarcales bien enraigonaos, qu’usen el control de los cuerpos de les muyeres como una ferramienta pa caltener el poder y l’orden social afitáu. 

El patriarcáu, na so manifestación contemporánea, sigue usando diferentes mecanismos pa oprimir a les muyeres nel ámbitu de los derechos reproductivos: 

1. Criminalización del albuertu: magar que l’albuertu ye llegal en dellos países, n’otros munchos entá ta mui castigáu. Esto fuercia a les muyeres a albuertar de ensin seguranza nenguan, poniendo en riesgu la so vida y la so salú. Los castigos tienen pena de prisión pa les muyeres y pa los profesionales médicos que les asisten. 
2. Control sobre la sexualidá: en munchos sitios, la sexualidá de les muyeres entá ye controlada pentemedies de normes culturales, relixoses o polítiques. L’accesu a la educación sexual integral y a los métodos anticonceutivos ta llimitáu o nun pueden pagalo y eso aumenta la esclusión y la vulnerabilidá. 
3. Estigmatización y violencia: les muyeres qu’acceden al albuertu o a métodos anticonceutivos son, davezu, estigmatizaes socialmente. Amás, bien d’elles son víctimes de violencia sexual, con poques oportunidaes d’accesu a xusticia o servicios d’apoyu afayaizos. Esta violencia sexual suel quedar impune, contribuyendo a la subordinación de les muyeres.. 
4. Prisión y castigos físicos: en dellos países, a les muyeres puen acabar preses o castíguenls físicamente por albortar, hasta en casos de violación o riesgu pa la salú. Estes midíes represives son una ferramienta pa perpetuar la sumisión y el control del cuerpu femenín. 

estes situaciones nun afecten namás a les muyeres, tamién tienen consecuencies permales pa les comunidaes en conxuntu. Cuando se llenden los derechos reproductivos, restrínxese la capacidá de les muyeres pa tomar decisiones autónomes cola so vida, la so salú, el so futuru, perpetuando ciclos de probitú y desigualdá. 

Nun mundu nel que la igualdá de xéneru y los derechos humanos habíen de ser un principiu fundamental, la llucha pola llibertá reproductiva y la igualdá plena entá ye un retu central escontra les estructures patriarcales. 

La comuña entre muyeres ye un pegollu fundamental na llucha pola autonomía sobre los nuesos cuerpos. La fuercia como coleutivu permítenos enfrentar de forma efeutiva les estructures patriarcales qu’intenten llendar los nuesos derechos. 

El lema “nosotres parimos y nosotres decidimos” ye un gritu poderosu d’afirmación qu’asoleya la soberanía que les muyeres tienen que tener de les sos propies vides y decisiones reproductives. Esta fuercia coleutiva, alimentada pola solidaridá, permítenos resistir y avanzar na conquista de la llibertá y la igualdá.

Xuntes somos imparables na llucha por un futuru nel que nenguna institución nin sociedá seya a decidir sobre los nuesos cuerpos.