SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
La prensa asturiana recueye güei información referida a los planes de la Conseyería d’Educación de cara a la flexibilización de dellos elementos na evaluación final del alumnáu d’esti cursu 2020-21. Como vien siendo vezu, estes midíes anúnciense al traviés de los medios de comunicación ensin cuntar antes cola participación de la comunidá educativa.
Por ello, dende’l sindicatu SUATEA queremos manifestar la nuesa opinión d’ello:
1/ Estes midíes tán empobinaes a facilitar los resultaos finales que llogre l’alumnáu nun cursu que tuvo marcáu poles consecuencies de la pandemia dende l’entamu. Anque se presenten como continuidá de les adoptaes pal cursu anterior, tenemos de recordar que les condiciones son dafechu distintes.
El cursu pasáu, esta flexibilización producióse cuando l’alumnáu recibiera yá los dos terceres partes de los conteníos previstos pa impartir a lo llargo del cursu. Dende SUATEA señalamos qu’aquellos conteníos que se diben a perder podríen recuperase a lo llargo de les primeres selmanes de setiembre, cuntando con una “re”- programación didáctica y l’esfuerzu del profesoráu, lo qu’inevitablemente tendría de suponer un aumentu sustancial de la plantiya docente.
2/ La decisión d’adoptar el sistema de semipresencialidad pal alumnáu nos centros, a partir de 3º d’ESO ye considerada por SUATEA como una vulneración del derechu a una educación de calidá y con equidá. Esti alumnáu nun va poder recibir l’atención educativa necesaria establecida nos programes vixentes na metá del tiempu pautáu como llectivu.
3/ La publicación d’un Resolvimientu de la Conseyería nel que se consoliden midíes de flexibilización similares a les del cursu pasáu tien por oxetivu esconder l’impactu negativu que’l sistema semipresencial causa na formación del alumnáu.
4/ La midida namá val pa templar a les families asegurando que los menores al so cargu nun van tener que faer frente a criterios ríxidos a la d’evalualos y, nel so casu, facilitar les correspondientes promociones de cursu.
5/ Tenemos una seria esmolición poles consecuencies que sobre la Escuela Pública va tener l’enriestramientu de les decisiones errónees tomaes, aniciaes a partir de la negativa a asumir lo inevitable: que pa garantizar que, en condiciones de pandemia pueda desenvolvese el cursu escolar colos menores entueyos posibles, ye necesariu un amenorgamientu de ratios d’alumnáu per aula y un reforzamientu de la plantiya docente.
Entendemos que son responsables d’estes decisiones la Conseyería d’Educación y el Gobiernu asturianu nel so conxuntu y que al tomales contribúin al deterioru de la Educación Pública polo xeneral y al deterioru creciente de les condiciones llaborales del profesoráu que ve cómo se minusvalora l’esfuerzu realizáu tolos díes, cómo asume los riesgos de l’andada vírica énte unes instrucciones de seguridá cambiantes y cómo aumentaba la so xornada llaboral (sobremanera cola atención educativa telemática dende les sos cases) ensin nenguna reconocencia alministrativa nin económica.
El Secretariáu de SUATEA
N’Uviéu, a 3 de marzu de 2021
Esta entrada está disponible en: Castellano (Castellanu)
