Desburocratización de la xera docente

El vienres 10 de mayu celebróse la primer xunta del grupu de trabayu p’analizar posibles midíes pa la simplificación de les xeres burocrátiques a les que s’enfrenta’l profesoráu.

Dende SUATEA, espúnxose que’l profesoráu emplega demasiao tiempu nel papeléu y xeres alministratives, munches d’elles non inherentes a la función docente y eso amenorga tiempu a la so xera esencial: enseñar al alumnáu. L’horariu ta sobrecargáu y estes xeres résten-y tiempu pa la preparación de clases y otros trabayos de corrección y evaluación.

SUATEA plantega faer una revisión, simplificación y racionalización de les xeres burocrátiques, evidenciando cuálos son inherentes al llabor docente y refugando toles  que nun son indispensables. Amás, ye imposible realizar estes xeres si’l profesoráu nun tien tiempu pa ello, polo que SUATEA FOI L’ÚNICU SINDICATU QUE PLANTEGÓ COMO IMPRESCINDIBLE INCLUYIR NEL HORARIU LECTIVU Y/O COMPLEMENTARIU HORES O SESIONES PA REALIZAR ESTES XERES BUROCRÁTIQUES DIENTRO DE LA XORNADA LLABORAL.

Ente otres, dende SUATEA fixéronse les siguientes propuestes:

• Aumentar la plantiya de personal d’Alministración y Servicios en tolos centros. Esti personal asumiría, ente otres, xeres rellacionaes col programa de préstamu de llibros o la introducción de dellos datos en SAUCE.
• Tocantes a les programaciones, proponemos que l’Alministración ufierte un modelu de programación a siguir y que namá sía necesario añedir lo que’l profesoráu considere.
• Simplificación de papeléu y d’execución nel resolvimientu de problemes por mal comportamientu, espulsión, acosu, absentismu, etc.
• Simplificación y racionalización de la tutoría: los/les tutores tienen que faer repitíes actes ya informes de redes, evaluaciones, d’atención a families, recoyida d’información del profesoráu, control de faltes, problemes de comportamientu y sanciones…
• Tocantes a actividaes complementaries y estraescolares, esíxense milenta papeles qu’acaben echando p’atrás al profesoráu: programación, solicitúes, xustificación económica, memoria final, cuestionarios de prestu, etc. Esiximos simplificar esta xera y dar facilidaes p’aquel que, de forma altruista, s’ufierta a realizar xeres estraescolares.
• Tocantes a les REDES de Secundaria, nun se tien en cuenta si se tienen munchos o pocos grupos y nun ye lo mesmo tener 4 REDES que 10. Proponemos que se compense nel horariu esta circunstancia cuando se realicen más de 6 REDES.

El Secretariado de SUATEA

N’Uviéu a 10 de mayo de 2019