Da-yos la to fuercia

Quiciabes nun les conoces, pero necesítente. Son muyeres que s’enfrenten tolos díis a una traxedia impensable, fortuita y mui cobarde. Cruzóse nes sos vides una mina terrestre o una bomba de racimu, abandonada y perdida entre otres casi 10 millones nel ermu sah.araui dende los tiempos de la guerra (1975 a 1991), y aprendieron a siguir lluchando, abnegaes, arreblagando peles estorbises de ser refuxaes y víctimes.

Víctimes, sí, como tol so pueblu. Víctimes de la muria marroquina nel Sah.ara Occidental, esa que colos sos 2.720 km de llargor divide’l territoriu sah.araui de Norte a Sur y d’Este a Oeste dende la muria, con seis tramos estraos de mines terrestres actives y otros restos esplosivos de guerra. Ye la segunda muralla más grande del mundu, depués de la xina, y ye la barrera física que dixebra families y torga la reunificación del pueblu sah.araui. Protexida por 160.000 soldaos marroquinos y sofisticada tecnoloxía militar d’última xeneración, les sos muries de sable y piedra amenacen la vida de la población y de los sos rebaños.

Llevantáu ente 1980 y 1987 pol exércitu marroquín como defensa pa torgar les incursiones del Frente POLISARIO, dixebra los territorios ocupaos de la zona lliberada. Mantenelu güei supón un costu de 2 millones d’euros diarios pa les arques marroquines, que s’abastecen de los recursos naturales expoliaos. Llevantóse estratéxicamente nes zones más elevaes y aprovechando tolos pozos d’agua, desvía los calces de los ríos y amenaza permanentemente la vida alredol de so, a unu y otru llau de la muria.

Elles son víctimes directes, como les 5.000 que yá se dieron dende qu’en 1975 se punxera la primer mina. Tamién son madres, hermanes, fíes de víctimes. Elles carguen coles consecuencies de los accidentes. Delles arrastren mancadures producíes poles bombes en racimu llanzaes pola aviación marroquina n’Amgala o Tifariti, en plenu éxodu sah.araui; otres perdieron les sos manes o pies nuna parada pa facer un té na so tierra llibre; otres curen les mancadures de los sos fíos, que toparon una ayalga nel ermu y españó, porque nun yera un xuguete; háiles que condenen les sos vides a cuidar d’un familiar dependiente dafechu o parcialmente por efectu d’un españíu… Traxedia convertida en coraxe que les fai tamién ser les primeres en ximielgar la bandera del basta yá; les que ponen los traxes de desminar y centímetru a centímetru van descontaminando la so tierra; o les que s’entreguen a la xera de sensibilizar nos campamentos de refuxados en Tindouf (Arxelia), onde se concentren les víctimes que se dan en zona lliberada. Son fuertes y valientes. Batallen pa que’l mundu mire pal Sah.ara Occidental y les ayude a pone-y acabu a esa muria que torga tanto y que produz namás muerte o mutilación. Tienen claro que lo faen por un oxetivu: La Independencia del so país.

Entamamos una campaña especial pa elles. Proponemos que-yos unviemos mensaxes solidarios, poemes, cantares, etc. nos que sientan la nuestra fuercia, el nuestru apoyu y el nuestru compromisu de batallar con elles p’algamar esmantelar la muria marroquina nel Sah.ara Occidental. Queremos facer un gran tapiz para que les acompañes siempre dende una paré na so sé nos campamentos de refuxaos. Por eso, los mensaxes han facese en pieces de tela, de non más de 15×15 cm, que coseremos pa facer esi tapiz. Destapa les tos habilidaes, sorpréndeles col to maxín y la to criatividá.

Nel viaxe que vamos facer n’abril pa participar nel VII Congresu de la Unión Nacional de Muyeres Sah.arauis, nos campamentos de refuxaos, llevaremos tolos mensaxes. Habrá un cachín tuyu con elles.

Previamente, vamos facer un gran actu en Madrid, del que vamos dir facilitando detalles.