Contra la esplotación sexual y el tráficu de muyeres

La Organización de Muyeres de la Confederación Intersindical contra la esplotación sexual y el tráficu de muyeres y menores

Otru añu más, como cada 23 de setiembre, dende la Organización de Muyeres de la Confederación Intersindical queremos denunciar el crime organizáu entamáu alredor del Tráficu de muyeres y menores con fines d’esplotación sexual, dando visibilidá a un delitu de dimensiones tan graves y arramaes como, paradóxicamente, tapecíes.

Magar que la trata de seres humanos se recoyó n’enforma trataos y convenios internacionales dende los primeros años del sieglu XX, nun hubo una respuesta institucional y política al mesmu hasta l’aprobación del Protocolu de Palermo soscritu nes Naciones Xuníes nel añu 2000, y del Conveniu de Varsovia, ellaboráu pol Conseyu d’Europa nel añu 2005. Dambos preseos anque ratificaos y publicaos n’España con retrasu (nos años 2003 y 2009, respectivamente), motivaron, en gran parte, l’aprobación de la normativa interna anguaño en vigor, hasta llegar al postreru y más recién Plan Integral de llucha contra la trata de muyeres y neñes con fines d’esplotación sexual (2015 -2018).

Toles investigaciones ya informes publicaos coinciden na dificultá para establecer de manera fiable les dimensiones d’esti delitu  por cuenta del so calter clandestín y tresnacional. Asina, ente que la Organización Internacional del Trabayu envalora, nel so informe “Trabayu forzosu, tráficu humanu y esclavitú” del añu 2014, que’l númberu total persones en situación de trata, xube a cuasi  21 millones de persones, la Organización de Naciones Xuníes, pela so parte, y nel mesmu añu, identificaba 40.000 víctimes nel Informe Mundial sobro Trata de Persones”. Sicasí, los dos organismos coincidíen al señalar un sesgu de xéneru desproporcionáu, non yá por rexistrar ente les muyeres a la mayor parte de les víctimes, sinón pola mayor severidá nes condiciones d’esplotación: según la ONU el 70 % de personar víctimes de trata son muyeres y, d’elles, el 21 % son neñes. Esta tasa de menores va n’aumentu y la principal finalidá ye la esplotación sexual.

La llucha contra la trata de muyeres esixe, poques gracies, la persecución de los tratantes y l’esmantelamientu del sistema económicu que-yos dexa llograr beneficios económicos a manplén. Pero les actuaciones absolutamente imprescindibles tienen de centrase nes muyeres: en facilitar l’accesu a los recursos de protección y sofitu, na formación ya información necesaria pa autoidentificase y poder romper les cadenes que conscientemente, en dellos casos, y inconscientemente, en munchos otros, caltener esclavizaes. Na mesma midida, resulta esencial la contribución de les organizaciones feministes nel espardimientu d’un mensaxe claru y contundente de tolerancia cero a la trata de muyeres con fines d’esplotación, la promoción de la igualdá y la llucha contra la violencia machista nes nueses sociedaes.

Esti 23 de setiembre, remontámosmos contra les trampes del patriarcáu, que siguen xustificando, banalizando y afalando a la violencia contra la muyeres, alimentando la demanda de servicios sexuales y, con ello, la trata de muyeres y neñes con fines d’esplotación sexual.

23 de setiembre de 2018

Secretaría de la muyer de SUATEA y Organización de Muyeres CI