Conceyu con Educación pa falar d’Atención a la Diversidá

El pasáu vienres 7 de febreru aconceyamos cola Direición Xeneral d’Ordenación, Evaluación ya Inclusión pa tresmiti-yos la preocupación de SUATEA pola situación de l’atención a la diversidá n’Asturies, y dientro de la campaña “Atención a la Diversidá: nun podemos ser inclusives aunque queramos”, qu’entamamos n’avientu de 2024. 

El nuesu ye l’únicu territoriu del Estáu que nun tien una llei de rangu autonómicu nin desarrollu normativu no que cinca a la inclusión del alumnáu. Recordámos-ys a los representantes de l’alministración presentes na reunión que, yá nel 2014, la Conseyería comprometiérase col SUATEA a asoleyar esi mesmu añu una normativa específica d’atención a la diversidá, condición del sindicatu pal alcuerdu sobre’l Decretu d’Orientación qu’asoleyó n’avientu d’esi añu. Sobre esti tema, la rempuesta que se nos dio foi la siguiente “diximos yá mil veces que vei salir, pero agora sí vei salir”, rempuesta qu’amás de paecer poco seria pa una institución pública, lleva siendo la mesma durante los últimos once años (la última vez foi al entamu d’esti cursu, cuando se nos dixo que saldría nel mes de payares). 

Sobre’l tema del profesoráu d’atención a la diversidá, la rempuesta foi más bien alarmante. La realidá anguaño ye que, si bien les contrataciones de profesoráu especialista aumenten (lo que denota les necesidaes de los centros), el 16% de les PTs yal 26% de les ALs tienen contratos temporales ya de xornada parcial. Cuando dende SUATEA falamos de la necesidá de un/a profesional de PT ya d’AL como parte de la plantiya orgánica de los centros, non solo p’atender al alumnáu con diagnósticu sinon tamién pa cumplir col principiu de prevención presente na normativa estatal ya, cumpliendo l’alcuerdu de plantilles robláu allá pel 2001, la rempuesta de la Conseyería ye que les plantiyes orgániques fórmense en función de les necesidaes estructurales del centru. D’esta última afirmación despréndese que, pa l’Alministración, el profesoráu especialista n’atención a la diversidá ya n’inclusión nun ye una necesidá estructural de los centros públicos asturianos, lo que nos paez terriblemente grave pa una institución que presume de que “la inclusión ye l’alma de la Conseyería d’Educación”. Los argumentos son contradictorios: reconózse la necesidá de más PTs nos centros pero nun s’estabilicen ya la norma ye la temporalidá ya la parcialidá de los contratos. Fálase de la necesidá de formar al profesoráu xeneralista en técniques como’l DUA pol mor d’una diversidá que vei medrando nes aules, nun se considera al profesoráu especialista una necesidá estructural. L’argumentu final ye la necesidá d’optimizar recursos, mientres se subvenciona la educación privada con 107 millones d’euros esti cursu.