Comunicáu del 1 de mayu 2018

Esti añu l’eslogan del nuestru primeru mayu ye “Escontra la precariedá”. Ye un eslogan que rescampla una realidá dramática, la realidá de muyeres, homes, mocedá y mayores a los que se-yos nieguen los derechos fundamentales, persones que constitúin los nuevos esclavos contemporáneos, que trabayen con horarios eternos, que coticen pela tercer parte d’ellos y  cobren sueldos de miseria que nun dan pa llevar una vida digna.

Nun ye una precariedá que surda de la nada, nun ye la consecuencia d’una crisis, sinón el frutu de polítiques que busquen acabar con derechos históricos conquistaos, polítiques impuestes adulces, como lladriyos que pretenden construyir la muria de la desigualdá y la inxusticia. Los sos cimientos tán bien claros: la moneda única, con un euro que desvaloriza, deprecia y desprecia la nuesa vida; una llei mordaza feroz que reprime les lluches sociales; un gobiernu que al dictame de la UE intenta desmontar los servicios públicos, degradando la educación pública pa beneficiar a la privada n’inversión, esviando servicios sanitarios a clíniques privaes y negando la estabilidá de miles d’empleaos y empleaes públicos que se van ver nel paru cola connivencia responsable de sindicatos como UGT y CCOO que roblen alcuerdos collaboracionistes ensin importa-yos les llacerioses consecuencies pa la clase trabayadora.

Al contrario qu’ellos, nun tamos dispuestos a la resignación. Pela cueta, la nuesa respuesta va ser siempres la llucha.  Dende tolos requexos siguiremos saliendo a esixir xusticia: xusticia pa les muyeres, qu’entovía tenemos que lluchar pa garantizar la soberanía sobro les nuestres propies vides; xusticia p’acabar cola precariedá de los y les trabayadores; xusticia pa los paraos y paraes y la xente mozo que tien qu’emigrar pa buscar un futuru; xusticia pa la xente pensionista de güei y de mañana, pa la xente refuxao que quieren facer invisible, xusticia p’acabar cola probitú enerxética y cola destrucción ecolóxica del planeta, xusticia p’acabar cola reciella  lladrones, corruptos y corruptes y tolos sos cómplices que dexen qu’esti sistema vaya convertinos n’esclaves y esclavos al serviciu d’unos pocos.

Nun vamos arrenunciar a la nuestra capacidá de llucha, de contestación na cai ante les agresiones. Exemplos como los de les muyeres el 8 de marzu, que, cola fuerza que da la rabia y el poder que da la razón, ablucaron al mundu inundando les ciudaes de morao. Exemplu que muestra que les reivindicaciones algámense asina, poniendo l’alma y el cuerpu, ensin mieos, axuntando toles manes y conquistando los espacios que nos quieren arrebatar.

Nun vamos arrenunciar a la nuestra identidá, a la nuestra llingua, que sobrevive magar les polítiques que lleven décades queriendo arrequexar ya ignorar los derechos de los falantes. L’asturianu y el gallego-asturianu son les llingües de les asturianes y los asturianos, llingües pa falales, esfrutales, defendeles y construir la nuestra realidá con elles.

Nun vamos arrenunciar tampoco a conquistes tan importantes como el derechu a unes pensiones dignes. Nun son les clases privilexaes les que dependen d’elles, somos la clas obrera, la que les necesita nel presente y les va necesitar nel futuru. Esta llucha ye la llucha de la xente trabayadora d’ayer pa la de güei y de la de güei pa la de mañana.  Esta conciencia histórica de llucha colectiva enséñamos qué camín garrar y demuestra que nun pueden atorollamos con discursos engañosos sobre la falta de recursos. Enséñamos que la nuestra fuercia ye la colectividá y que con ella cuntamos pa enfrentamos y ganar a la minoría d’esplotadores.

La llucha del sindicalismu de clase y alternativu tien que xugar un papel fundamental, representando la coherencia a la escontra la corrupción, el clientelismu y la traición de los otros. La nuestra responsabilidá ye tresmitir la esperanza, posibilitar la construcción d’alternatives sociales, demostrar que naide ta solu, que somos un solu puñu, el puñu que va fender la muria de la precariedá, de la inxusticia y del machismu.

¡Pola construcción d’otru mundu, d’otra sociedá!

¡Puxa la llucha de la clase obrera!

¡Puxa Asturies!

Xixón, 1 de mayu de 2018