Comunicáu de refuga al seminariu internacional pol derechu a la vida

El Congresu de los Diputaos va ser la sé nos próximos 3 y 4 de xunetu del actu antialbortista Seminariu Internacional pol Derechu a la Vida, entamáu pol colectivu “Parlamentarios y Gobernantes pola vida” nel marcu de la so Acción mundial pola vida y la familia .En dichu actu, inauguráu pol ministru Gallardón y realizáu nel llugar más simbólicu de la Democracia española van participar parlamentarios y parlamentaries  de distintos países, ente ellos Arxentina, Armenia, Chile, Ecuador, el Salvador, Perú, El Salvador, Francia o Italia. El so denominador común la vinculación colos movimientos relixosos católicos más conservadores y la so falta de credibilidad ente la defensa de los derechos humanos, onde s’encuadren los derechos sexual y reproductivu de les muyeres. El so oxetivu dar sofitu a la despótica reforma de la llei del  IVE del ministru.

Pa entender la transcendencia d’esti actu fai falta recordar qu’esti movimientu, al que van dar abellu les parés del Congresu, tien el so orixe en Chile, como oposición al Proyectu de Llei de Michelle Bachellet sobre llegalización del albuertu y qu’unu de los sos oxetivos ye “refugar tou proyectu de llei qu’acepte o suponga cualquier tipu de práctica albortiva, euxenésica, eutanásica, de encarnizamientu terapéuticu, mutilante, clonizante o que manipolie la vida humana, cualesquier sían los medios utilizaos pa ello o oxetivos que pretendan xustificalos”.

Dende la Organización de Muyeres de SUATEA recordamos de nuevu qu’estes persones que se manifiesten en contra del derechu a decidir de les muyeres sobre los sos cuerpos, nun son pro-vida, sinón anti-derechu a escoyer de les muyeres. La celebración d’esti Seminariu ye una desvergüenza qu’ofiende la intelixencia y los principios de respetu a la llibertá d’elección de toos y toes. Resulta obsceno falar de derechu a la vida cuando nesos mesmos países déxase morrer a les muyeres víctimes d’albuertos clandestinos, obligase-yos a siguir con embaranzos de riesgu que ponen en peligru les sos vides, inclusive d’aquellos que son frutu de violaciones, y onde se-yos va facer curiar a criatures con graves malformaciones ensin ayuda dalguna. Son miembros d’esta iniciativa en “defensa de la vida”, países onde se esteriliza  a les  muyeres indíxenes ensin el so consentimientu y de manera agresiva, onde les muyeres qu’albuerten pueden pasar hasta 40 años en prisión, onde miles de neñes queden estigmatizaes por una maternidá precoz. Y va ser cola realidá de desprotección de les muyeres nestos países con quien nos hermanará l’aprobación de la Llei de Protección al Concebíu y derechos de la Muyer Embarazada del actual executivu, llevada bien probablemente al Conseyu de Ministros nos próximos díes.

Esti seminariu, que se va celebrar nuna sala del Congresu de los Diputaos va cuntar amás cola agasayadura y el patrociniu del Conceyu de Madrid, que la so alcaldesa -Ana Botella- yá anunció la recepción oficial de toles persones participantes nel seminariu. Too ello al cargu de les arques públiques, una vergüenza más.

Por too ello, dende la Organización de Muyeres de SUATEA manifestamos otra vegada la enérxica repulsa a esti Seminariu y denunciamos l’usu d’instalaciones y recursos públicos d’un actu propagandísticu contra la llibertá de les muyeres y que solo busca reforzar al executivu del Partíu Popular nesta contrarreforma de la Llei del IVE. Una reforma que nun cunta con nengún respaldu social nin prácticamente políticu y en que’l so testu nun collaboró nenguna persona profesional esperta na materia, nin asociaciones de muyeres feministes. Una reforma que, tal como denunciemos repetidamente, solo va portar más muertes de muyeres víctimes d’albuertos clandestinos, muertes que van ser imputables a esti gobiernu.

Dende la Organización de Muyeres de SUATEA xuntamos a les convocatories d’actos de refuga a la contrarreforma, recordando al conxuntu de la sociedá la importancia de faelo, yá que tán en riesgu derechu sexuales y reproductivos inviolables que nos llevaren a un retrocesu ilexítimo y tendencioso na nuesa hestoria.

Organización de Muyeres de SUATEA.

Uviéu, 2 de xunetu de 2014.