La organización de muyeres de SUATEA contra la esplotación sexual

En 1999 la Conferencia Mundial de la Coalición Contra’l Tráficu de Persones, en coordinación cola Conferencia de Muyeres que se fexo en Dhaka, Bangladex, punxeron el 23 de setiembre como’l Día Internacional contra la Esplotación Sexual y el Tráficu de Muyeres, Nenes y Nenos.

La esplotación sexual ye un negociu prósperu pa les mafies y proxenetes que capten, secuestren, violen y obliguen a prostituyise a miles de muyeres y nenes cada día. Un negociu que-y supón una ganancia media de más de 110.000 euros al añu a un proxeneta por cada persona prostituyida, la gran mayoría del sexu femenín.

A nivel mundial, les muyeres constitúin el 85% de les víctimes de la trata de persones col envís d’esplotación sexual. El segundu negociu mundial depués del de tráficu d’armes. Un negociu que mueve más de siete billones de dólares añales, que supón el desplazamientu de más de cuatro millones de persones cada añu y al que la crisis económica nun afectó. Sí lo fexo a la situación de les mujeres y menores, más vulnerables a ser captaes poles situaciones de probitú y miseria estrema o polos desplazamientos forciaos a causa de los conflictos armaos. Amás, les polítiques represores en materia de migración y asilu na Unión Europea inciden nel aumentu de les mafies.

La educación sexista y la cultura del consumu de sexu pagáu aumenten cada día baxo la permisividá de los gobiernos. Los modelos económicos d’Eurovegas o de los grandes burdeles como’l de la Junquera, basaos na falta de fiscalidá y la esplotación de muyeres y nenes, tán imponiéndose col preste de los gobiernos y la impasividá social.

Nel Estáu español calcúlase qu’hai unes once mil places n’hoteles que se dediquen a la prostitución, amás de los pisos, locales, cais, carreteres, parques, polígonos… Ye revesoso escaecese de la rialidá de miles de muyeres esplotaes, esclaves sexuales, muyeres ensin nengún derechu, a las que se-yos quitó una vida que difícilmente van recuperar.
Sigún los informes policiales, la mayoría de les víctimes son estranxeres en situación irregular. El terror a los proxenetes, la situación d’irregularidá y el tremendu shock que padecen estes víctimes fai que namás un 1% d’elles s’atreva a denunciar.

La crisis fexo aumentar el númberu de muyeres de nacionalidá española prostituyíes, anque’l porcentax mayoritariu sigue siendo d’estranxeres en situación irregular. Pero como’l proxeneta nun acepta ganar menos, les muyeres han de facer el mesmu serviciu por menos perres o aumentar el númberu d’éstos. ¡Vergoñoso! Por si fuera poco, cola mesma sida de siempre, la crisis, el gobiernu dexa fuera de la cobertura sanitaria a les muyeres prostituyíes, yá que la gran mayoría ta en situación irregular. Estes muyeres tienen graves problemes sanitarios que requieren tratamientos: VIH, ETS, Hepatitis C, Tuberculosis, etc. Munches d’elles albuerten, otres siguen p’alantre colos sos embarazos, lo que va dexar a les futures criatures nuna situación de total desprotección sanitaria.

Pero toes estes cifres, esta tremenda rialidá de miles de muyeres y nenes que vemos na nuestra redolada nun valen pa qu’esi trenta por cientu de los homes del Estáu español, esos que se conocen como clientes -verdaderos responsables de qu’hebia prostitución- se planteguen que tán contribuyendo a la esclavitú d’eses muyeres.

Les úniques polítiques que se tán faciendo contra la explotación sexual pasen pela sanción a les muyeres prostituyíes, una vergoña que namás obedez a la pretensión de “llimpiar les cais”.

Por too ello, la Organización de Muyeres de la Confederación Intersindical y de SUATEA manifiesta:

• El so total refugu a cualisquier forma d’esplotación de les muyeres y menores.
• La obligación de los gobiernos de protección, asistencia, reinserción y reparación a toles víctimes.
• La desixencia a los gobiernos de perseguir y sancionar a mafies y proxenetes.
• La necesidá de la educación afectivo-sexual basada nel respetu a la diversidá y la igualdá.
• El desendolcu de la normativa actual en materia de trata y la dotación presupuestaria abonda pa facela.

Descargar PDF: Comunicáu de la organización de muyeres de SUATEA contra la esplotación sexual

Visualizar en Scribd: Comunicáu de la organización de muyeres de SUATEA contra la esplotación sexual