Catorce centros educativos ensin profesoráu de Llingua Asturiana y Gallego-Asturiano pola escandalosa falta de previsión de la Conseyería

SUATEA solicita la inmediata apertura de les bolses d’aspirantes a interinidá neses asignatures.

Depués de la última axudicación de places al profesoráu interín quedaron en Primaria 12 escueles ensin docente en Llingua asturiana y dos en Gallego-asturianu. La causa ye la escandalosa falta de previsión de la Conseyería d’Educación que nun convocó la criación de nueves bolses d’aspirantes a interinidá  sabiendo dende mediaos del cursu pasáu que taben escosándose les llistes. Les característiques propies de les places que se tarden más en cubrir corresponden coles zones rurales de les ales d’Asturies, toes elles a media xornada y munches, amás, itinerantes.

Too ello muestra otra vez la precariedá nes condiciones llaborales del profesoráu con nefastes consecuenciespa la calidá de la enseñanza y pal desarrollu d’estes árees nos centros. Tolos años vemos como la desidia y la falta d’interés por normalizar, recuperar y promocionar la llingua propia provoca un deterioru que sedrá revesosu d’iguar nun futuru inmediatu. Nun se cumple la llei d’usu y promoción nin se faen realidá promeses como la criación de la especialidá prometida en delles ocasiones pola Conseyera d’Educación.Ye fundamental, nun procesu de normalización llingüística estabilizar l’asignatura nel sistema educativu y qu’algame l’estatus qu’el restu d’árees tienen. Pa ello consideramos qu’ún de los encontosmás importantes ye’l profesoráu y la so estabilización pa poder garantizar una continuidá de les enseñances nos centros educativos.

Dende SUATEA exigimos a la Conseyería:

• Entamar darréu’l procesu d’apertura de nueves bolses d’aspirantes a interinidá en Primaria, tanto pa Llingua Asturiana como pa Gallego-asturianu como condición indispensable pa poder atender a les necesidaees demandaes pol alumnáu nos centros educativos.
• Criar yá la especialidá d’estes árees y qu’ello lleve a la equiparación col restu d’asignatures cola correspondiente convocatoria d’oposiciones qu’estabilice la plantiya.
• Que dende esta Conseyería de Cultura se tome la iniciativa de dignificar l’asturianu promoviendo la so oficialidá.

Descargar PDF: Catorce centros educativos ensin profesoráu de Llingua Asturiana y Gallego-Asturiano pola escandalosa falta de previsión de la Conseyería

Ver PDF en scribd: Catorce centros educativos ensin profesoráu de Llingua Asturiana y Gallego-Asturiano pola escandalosa falta de previsión de la Conseyería