Carta abierta a la Sra. Conseyera d’Educación, Cultura y Deporte

“Yo lo que quiero saber es qué grupo escolar no tiene los recursos que necesita de acuerdo con los acuerdos de plantilla que tenemos con los sindicatos”                                      (Ana González)

 

Dende SUATEA dámos-y respuesta:

La otra selmana quien formamos parte de la comunidá educativa asturiana pudimos lleer plasmaos cómo la Sra. Conseyera d’Educación Ana González facía esta declaración:

“De qué estamos hablando, ¿de atender las necesidades de los estudiantes o de otra cosa? Yo lo que quiero saber es qué grupo escolar no tiene los recursos que necesita de acuerdo con los acuerdos de plantilla que tenemos con los sindicatos. Eso es lo que he pedido reiteradamente en diversas reuniones a los sindicatos y que todavía no me han traído”, ha aclarado.

Énte esta ablucante afirmación decidimos contesta-y a la Sra. Conseyera.  Vamos analizar qué diz l’alcuerdu de plantiya pa Colexos públicos d’Educación Infantil y Primaria suscritu ente l’Alministración del Principáu d’Asturies y les organizaciones sindicales y cuála ye la situación real nos centros educativos:

1.- Itinerancies

Lo que diz l’alcuerdu no que toca a les itinerancies:

“Todos los Centros dispondrán de especialista de PT (Pedagogía Terapéutica) a tiempo total o compartido, con un límite máximo de 2 Centros, tanto para tareas de rehabilitación como de prevención.”

“Todos los Centros dispondrán de especialista de AL (Audición y Lenguaje) a tiempo total o compartido por 2 Centros y excepcionalmente por tres; tanto para tareas de rehabilitación como de prevención. “

Analizando’l documentu de trabayu que recibimos per parte de la Conseyería cola plantiya del próximu cursu topamos 1 centru onde l’especialista de PT  itinera con 4 centros (según l’alcuerdu máximo 2), asína como 5 escueles nos l’especialista d’AL itinera a 4 centros (según l’alcuerdu escepcionalmente 3). Equí, Sra. Conseyera, topamos el primer incumplimientu de los alcuerdos de plantiyes:

PT  que  itinera 4 centros:

• CP Poeta Antón Mari-reguera-Candás

AL que itinera 4 centros:

• CP Asturamerica- Cuideiru
• CP Vital Aza – La Pola (L·lena)
• CP de Infiesto- L’Infiestu
• CP San Miguel – Trevías
• CP Cornellana – Curniana

Los casos nos que’l profesoráu d’AL  itinera a 3 centros son una montonera, pesie a que nel alcuerdu trátase d’una midida escepcional. Un pequeñu exemplu:

• CPEB de Cabañaquinta- Ayer
• CP Poeta Antón Marireguera- Candás
• CP Castillo de Gauzón- Castrillón
• CP Darío Freán Barreira- Cuaña
• CP Virgen del Fresno-Grao
• Etc…

Los casos nos qu’un PT itinera a 3 centros, casu non contempláu nel alcuerdu, tamién son abondos:

• CP de Moreda- Ayer
• CP Ablaña Pereda – Mieres
• CP Chamberí –Salas
• Etc…

Tamién diz l’alcuerdu que trataráse de “establecer una plantilla propia para cada centro, que evite en lo posible itinerancias y puestos compartidos”. Pues bien, topámonos con que’l docente de Música del CP Ablaña-Pereda itinera repartiendo’l so horariu de trabayu ente 5 centros educativos y con otres munches places de Música y EF qu’itineren ente 3 y 4 centros. Tamién topamos una plaza docente d’Orientación Educativa nel Centru d’Educación de Persones Adultes de Xixón qu’itinera col CEPA de Centru-oriente, el CEPA del Nalón, el CEPA del Caudal, el CEPA Oriente-interior, CEPA Oriente-costa, esto ye, prácticamente Asturies entera.

2.- Especialistes

Según l’alcuerdu tolos centros incompletos habrán tener profesoráu d’Infantil y Primaria y “El resto de las especialidades (Música, Educación física, Ingles, PT, AL) correspondientes se atenderán con maestros itinerantes”. Pues bien, Sra. Conseyera, estos centros, según el documento cola plantiya que mos remitió carecen d’especialista dalu (nun existe’l puestu nel centru nin se recibe por itinerancia):

• CP de Prado (Caravia):  ensin especialista de Música
• CRA Eugenia Astur (Tineo):  ensin especialista de  Música
• CP Alvaro Flórez Estrada (Somiedu):  ensin especialista d’Educación Física
• CP Teodoro Cuesta (Mieres): ensin especialista d’ Educación Física
• CP El Pascón (Tinéu): ensin especialista de Música
• CPEB Las Arenas (Cabrales): ensin especialista d’Educación Física
• CP Matemático Pedrayes (Llastres): ensin especialista de Música

Equí, Sra. Consejera, alcontramos el segundu incumplimientu del alcuerdu de plantiyes, anque puede ser que namás se trate de que’l so Director Xeneral de Personal Docente y Planificación Educativa piense que los neños y neñes d’estos centros tengan dotes naturales pa estes materies y polo tanto nun necesiten profesoráu.

3.- Apoyos n’Educación Infantil

Vamos col tercer incumplimientu del alcuerdu de plantiyes, que se refier al profesoráu d’apoyu nos centros d’infantil: “Asignar 1 maestro de apoyo en Educación Infantil a partir de 3 unidades y 2 maestros de apoyo a partir de seis unidades”. Equí topámonos con un carráu de centros que nun tienen asignaos los docentes d’apoyu que-yos correspuenden o incluso nun lleguen a tener un docente por unidá; pasamos a detallar dalgún de los munchos casos nesta situación:

• CRA Maestro D. José Antonio Robles – Caborana:
  3 unidaes d’infantil, asignación per parte de la Conseyería de 2 docentes d’infantil cuando deberíen ser 4 docentes.
• CP Laviada – Xixón:
  9 unidaes d’infantil, asignación per parte de la Conseyería de 10 docentes d’infantil cuando deberíen ser 11 docentes.
• CP Los Pericones – Xixón:
  6 unidaes d’infantil, asignación per parte de la Conseyería de 7 docentes d’infantil,  cuando deberíen ser 8 docentes.
  CP Elena Sanchez Tamargo – Pola de Laviana:
  8 unidaes d’infantil, asignación per parte de la Conseyería de 9 docentes d’infantil,  cuando deberíen ser 10 docentes.
• CP San José de Calasanz – LLanera:
  6 unidaes d’infantil, asignación per parte de la Conseyería de 7 docentes d’infantil,  cuando deberíen ser 8 docentes.
• Etc …

Esta reducción de places, Sra. Conseyera, suponemos que se debe a la balta qu’usté ta tratando de facer en determinaes escueles nun se sabe mui bien baxo  qué criteriu, achuquinando unidaes de 3 años d’infantil cuando nin tan siquier s’entamó’l procesu d’almisión del alumnáu. Dellos centros que tán sufriendo la eliminación d’una unidá de 3 años son estos:

• CP Liceo Mierense- Mieres
• CP Aniceto Sela- Mieres
• CP El Parque – Blimea
• CP Jose Bernardo-Sama
• CP Asturias –Xixón
• CP  Los Pericones-Xixón
• CRA Maestro Don Jose Antonio Robles-  Caborana
• CP El Vallín –Xixón
• Etc…

4.- Tutores de Primaria

L’alcuerdu diz que tolos centros educativos han disponer d’esta plantiya básica:

Cuadru de plantiya básica según l’alcuerdu:

Equí, Sra. Conseyera hai que sulliñar la sangría que ta padeciendo’l profesoráu de la especialidá de primaria y de la que nesti cursu recorten  90 places obligando a que seya’l profesoráu especialista  quien faga les tutoríes de primaria. Estos vense obligaos a desatender necesariamente la so materia específica p’atender prácticamente n’esclusiva la xera que conlleva la tutoría. Ta claro qu’a usté nun-y interesa la calidá del enseñu, lo único que-y importa ye afirmar que tolos neños y neñes asturianos tán atendíos. Atendíos sí, ¿pero en qué condiciones? Usé ta confundida, Sra. Conseyera: nun diecimos qu’hebia neños y neñes ensin profesor, lo que dicimos ye que l’enseñu que tán recibiendo ta mui lloñe de ser de calidá  y que cola so política cada cursu, la calidá allóñase más y más.

Veamos tamién dellos exemplos de los munchos que tenemos onde l’alumnáu nun tien un tutor de la especialidá de primaria:

• CP Principe de Asturias– Xixón :
  12 unidaes de primaria, asignación per parte de la Conseyería 10 tutores de primaria, 2 tutoríes a cubrir por restos d’horarios de los especialistes.

• CP Gaspar Melchor de Jovellanos– Xixón :
  19 unidaes de primaria, asignación per parte de la Consejería 16 tutores de primaria,  3 tutoríes a cubrir por restos d’horarios de los especialistes.

• CP Buenavista I– Uviéu :
  9 unidaes de primaria, asignación per parte de la Conseyería 6 tutores de primaria, 3 tutoríes a cubrir por restos d’horarios de los especialistes.

• CP Gesta II– Uviéu:
  9 unidaes de primaria, asignación per parte de la Consejería 6 tutores de primaria, 3 tutoríes a cubrir por restos d’horarios de los especialistes.

• Etc…

Nesti documentu, Sra. Conseyera, namás apaez un pequeñu estractu con dellos exemplos de centros nos que s’incumple sistemáticamente l’alcuerdu de plantiyes de primaria, qu’usté la otra selmana aseguraba cumplir. A esta llista podríemos añedi-y los cientos d’alegaciones que mos fexeron llegar los centros educativos, anque usté yá ye conocedora d’ello, yá qu’en boca del so Director Xeneral  de Centros y Planificación Educativa pudimos sentir que’l 50% de los centros educativos que formen la rede pública asturiana unviaron alegaciones a les plantiyes docentes pal próximu curso y que depués de recibir la negativa per parte de l’Alministración un 19% volvió a amosar el so malcontentu. Polo tanto Sra. Conseyera, polo menos un 19% de los centros públicos asturianos piensen que’l so alumnáu nun va tar atendíu correctamente el cursu que vien, y eso nun lo dicimos nós; manifiéstenlo les direcciones de los centros que se ven torgaos p’atender les necesidaes reales del alumnáu por falta de medios, ensin tiempu nin recursos pa una atención a la diversidá correcha, amañosa y de calidá.

5.- Otros recortes (a sumar a los derivaos del incumplimientu de los alcuerdos colos sindicatos)

Amás achuquínense puestos de trabayu nos centros de persones adultes, les places correspondientes al primer ciclu d’enseñanza secundaria amortícense y nun son cubiertes por profesoráu de secundaria en bona parte de los IES, desapaecen places imprescindibles nos Institutos colo que nun se garantiza nin l’atención a la diversidá nin la elección d’optatives per parte del alumnáu.

Llántase un concursu de tresllaos paralelu a igual que pasa en comunidaes como la madrilana, criando places con perfil billingüe ensin que’l profesoráu qu’anguaño imparte esti programa tuviera conocimientu enantes del concursu de tresllaos de qu’eses places saldríen a concursu y ensin qu’hubiera un análisis seriu y curiosu sobre l’enseñu d’idiomes na nuestra comunidá.

Esto ye, la so política de personal en materia de plantiyes consiste n’amortizar decenes de places que taben ocupaes por profesoráu que se xubila. El resultáu es ablayante pal sistema públicu d’enseñanza: un xigantescu Espediente de Regulación d’Empléu que supunxo la supresión de 2.500 puestos docentes nos últimos diez años.

Por ello dende SUATEA desiximos una rectificación y una verdadera negociación de la plantiya docente, anque les feches nes que se convocaron les Meses Sectoriales facíen prácticamente imposible esa negociación, yá que según la normativa estatal, les places que formen la plantiya provisional han de tar en poder de l’alministración estatal el martes 25 de febreru día en que l’alministración asturiana convocado una mesa… ¿de negociación?.

Uviéu, 25 de febreru de 2014

Secretariáu de SUATEA