Comunicado “Campaña de boicó a los deberes”

Ante la campaña de boicó a los deberes los fines de selmana del próximu mes de payares, impulsada pola Confederación Española d’Asociaciones de Padres y Madres del Alumnáu (CEAPA), dende SUATEA, entá entendiendo la esmolición de les families sobre esti asuntu, manifestamos:

1. El nuesu refugu a esa campaña que cuestiona la profesionalidá del profesoráu y que puede llevar a conflictos innecesarios nos centros docentes, lo que nun ye nada deseable.
2. La nuesa esmolición porque dende la CEAPA se ponga’l focu d’atención sobre una cuestión que, siendo importante, resalva otres munches que necesiten alderique, como los constantes cambeos lexislativos, los inabarcables currículos, la sobrecarga llaboral y burocrática que sufre’l profesoráu, la falta de medios, les elevaes ratios o los incesantes retayos presupuestarios y de plantiya.
3. Que compartimos cola CEAPA que nun ye almitible que recaya nes families la xera principal de refuerzu educativu. La LOMCE esanició tolos programes de refuerzu ensin introducir nos centros educativos mecanismos pa la compensación de les desigualdaes sociales, creando situaciones d’abandonu y d’indefensión al alumnáu más desfavorecio económica, social y culturalmente.
4. Que ye necesaria l’apertura d’un alderique ampliu y serenu al respective nel que se defenda un modelu de xeres que potencien la creatividá y la imaxinación. Entendemos qu’esti tipu de campañes enzanca esta necesaria serenidá.
5. A lo último, faemos un llamamientu al profesoráu a nun entrar en discutinios ermos derivaos d’ésta o otres desacertaes campañes. Otra manera, lo que procede ye facilitar l’alderique saludable y abiertu nel senu de cada Comunidá Educativa, dende’l respetu al llabor del profesoráu y dende una perspectiva de participación democrática de tolos sectores implicaos na xera educativa.

28 d’ochobre de 2016