Auxiliar educador: procesu selectivu

Illegalidaes ya inxusticies nel procesu de selección d’auxiliares educadores.

El pasáu  25 de payares de 2017 celebróse la primer prueba pa la provisión de places d’auxiliar educador de l’alministración del Principáu d’Asturies venceyaes al nivel académicu d’Educación Secundaria Obligatoria.

Tres la realización d’esta prueba, el descontentu foi xeneralizáu por mor de que les entrugues de la prueba nun s’afayaben a les funciones propies de la categoría, incluyendo ente elles cuestiones ensin sen pal exerciciu de la figura d’auxiliar educador.

Esti descontentu nun quedó ehí, non solo s’atopa’l problema nel plantegamientu y conteníu la prueba, sinón tamién nel cambéu la nota corte na primer parte del procesu pa ser quien a pasar a la segunda fase que se cellebrará’l viniente 3 de febreru de 2017. Esti cambéu na nota mínima pa siguir nel procesu oposición   fíxolu l’alministración depués de comprobar que cola anicial nun pasara naide. Con ello llograron pasar a la segunda fase 94 aspirantes d’un total de 4200.

Vistes tales inxusticies convertíes n’illegalidaes dientro d’un procesu selectivu que namás podemos considerar un verdaderu despropósitu, SUATEA amuesa tol sofitu necesariu a les reclamaciones  de los/les aspirantes  con cuenta de que l’alministración execute la selección respetando la llegalidá vixente con total  tresparencia nel procesu selectivu.

Uviéu, 16 de xineru de 2018.