Atención a la diversidá: la gran perxudicada

ATENCIÓN A LA DIVERSIDÁ: LA GRAN PERXUDICADA

Cuando’l 2 xunetu denunciemos les falcatrúes detectaes a últimos de cursu, al publicar les plantiyes docentes de los centros educativos –el raquitismu de los recursos d’Audición y Llinguaxe y Pedagoxía Terapéutica, la desapaición de la referencia a los apoyos intensivos d’hasta 10 hores selmanales nes instrucciones de los SEO, ente otros-, nin nos nuesos peores suaños imaxinamos el despropósitu de la paupérrima ufierta de places que la Conseyería d’Educación llevó a cabu na primer convocatoria d’interinidá que tuvo llugar esi mesmu mes. Magar que ye verdá que la práctica totalidá yeren places a xornada completa, éstes resultaben, nidiamente, insuficientes.

Desconocemos cuála va ser la ufierta de la segunda convocatoria anunciada antieri pal próximu vienres, 11 de setiembre, pero les instrucciones daes a los centros pa que faigan los sos cálculos escarecen, una vegada más, de sentíu pedagóxicu -la inclusión, nin taba antes, nin agora- o, a cencielles, de sentíu.

¿Cómo s’esplica, si non, que pa solicitar un aumentu na yá de por  sí raquítica plantiya de profesoráu d’AL y PT, se tenga que calcular si’l númberu d’alumnos y alumnes “etiquetaos con necesidaes educatives especiales ye mayor o menor que’l númberu d’unidaes (grupu-clase) del centru? Esti ye l’estrafalariu criteriu que se va emplegar.

Nun importen les característiques individuales so la etiqueta xenérica “nee”, nun importa’l criteriu profesional del personal especializáu, lo realmente útil ye saber el númberu d’unidaes del centru. D’esta manera, si’l  númberu total d’alumnáu NEE ye menor o igual al númberu d’unidaes del centru asignarán dos hores de PT per cada alumnu NEE. Si’l númberu total del alumnáu NEE ye mayor al númberu d’unidaes del centru asignarán trés hores per cada unidá que tenga autorizada’l centru.

P’Audición y Llinguaxe ye entá peor, teniendo en cuenta qu’eses hores divídense ente 2 en cada unu de los supuestos y el motivu ye… Anque escarecemos d’una respuesta oficial, albidramos la causa oficiosa: l’aforru. La guinda de tou esti pastel apaez na instrucción final: nestos cálculos d’unidaes vs acnee “Nun se van considerar los desdobles por COVID”.

Va retayase onde más  se precisa yá qu’esti alumnáu foi’l más perxudicáu mientres l’estáu de confinamientu y polo que vemos la Conseyería va siguir abandonándolo. Dende SUATEA dicimos ¡abasta yá d’instrucciones pelegrines p’aforrar n’equidá ya inclusión!

ESIXIMOS UNA INVERSIÓN ECONÓMICA AL ALTOR DE LA LLEGALIDÁ VIXENTE PA UNA ESCUELA INCLUSIVA REAL.

ESIXIMOS UNA NEGOCIACIÓN QUE REGULE LES CONDICIONES LLABORALES DEL PROFESORÁU D’ATENCIÓN A LA DIVERSIDÁ.

 El Secretariáu de SUATEA, n’Uviéu, a 4 de setiembre de 2020