Asturies nun propón una solución pa evitar dexar na cai al profesoráu interino de FP ensin titulación universitaria

Asturies, ente les poques Comunidaes del Estáu que nun propón una solución pa evitar dexar na cai al profesoráu interino de FP ensin titulación universitaria’l próximu 1 de setiembre

El marcu normativu nel que se regulen les condiciones de trabayu y el sistema d’ellaboración, xestión y funcionamientu de les llistes d’aspirantes a interinidá na función pública docente recoyíu nel Alcuerdu d’interinidá soscritu en cada comunidá autónoma. Por esti motivu, el Ministeriu d’Educación refugó solucionar tolos interrogantes plantegaos a cuenta del Real Decretu 800/2022, pol que se regula la integración del profesoráu del Cuerpu, a escastar, de Profesores Técnicos de Formación Profesional nel Cuerpu de Profesores de Secundaria al respective de la situación del personal interino, tanto de quien cumplíen el nuevu requisitu de titulación universitaria esixíu pa poder integrase en dalguna de les 19 especialidaes que pasen a Secundaria, como de quien non.

Too esto coincide, amás, metanes unos procesos estraordinarios d’estabilización convocaos, precisamente, pa tratar de compensar l’abusu na contratación temporal cometíu poles alministraciones públiques; procesos selectivos (concursu de méritos y concurso oposición) nos que s’ufierten la mayoría de les places vacantes que tuvieron ocupando en réxime d’interinidá mientres 30 años, o más, y nos que tampoco pueden participar porque la titulación universitaria ye requisitu d’accesu.

Pero entá hai más: la non participación nos procesos selectivos d’estabilización taraza’l derechu a percibir la compensación económica por cese definitivu prevista na Llei 20/2021 de midíes urxentes d’amenorgamientu de la temporalidá.

Esta situación tendríase evitao si’l gobiernu asturianu tuviere convocao los procesos d’estabilización antes del 6 d’ochobre de 2022, momentu de la entrada en valor del Real Decretu d’integración, tal que fixo’l Gobiernu Vascu na so ORDE de 22 de setiembre de 2022, qu’axusta lo siguiente: el requisitu de titulación indicáu nel apartáu a) -Diplomáu Universitariu, Arquiteutu Técnicu, Inxenieru Técnicu o Grau- va poder ser sustituyíu pol cumplimientu simultaneu de los dos siguientes requisitos:
– Una esperiencia docente de, siquier, dos años na especialidá a la que s’opta, en centros docentes públicos d’esta Comunidá Autónoma.
– Tener un títulu de Técnicu Especialista o Técnicu Superior nuna especialidá de la familia profesional a la que pertenez la especialidá a la que s’opta.

Una vegada aniquilada esta posibilidá, solo queden midíes secundaries como les que plantegaron yá otres munches alministraciones educatives, inclusive dende’l mesmu Ministeriu d’Educación nel so ámbitu de xestión (Ceuta y Melilla), introduciendo cambeos nos sos respectivos alcuerdos o ordes d’interinidá.
Sicasí, n’Asturies, por cuenta de un Alcuerdu d’Interinidá que SUATEA nunca soscribió y que sigue ensin modificar, la imposibilidá de presentase a les oposiciones, significa, amás, nun poder permanecer nes llistes d’aspirantes a interinidá del próximu cursu. Ye’l crime perfechu.

Al aviesu, a la falta de voluntá política del nuesu Gobiernu, esisten otros -Murcia, Castiella y Llión, Galicia, Canaries, Castiella la Mancha, País Vascu o Madrid- que yá atoparon les soluciones que n’Asturies son incapaces de topar.

N’otres comunidaes, como Cantabria, les garantíes veníen “de serie” nos sos alcuerdos d’interinidá, al dexar permanecer nes llistes ensin tener que presentase obligatoriamente a les oposiciones. En Murcia, inclusive tienen un artículu específicu pa mayores de 55 años que recueye lo siguiente: los integrantes de les llistes vixentes a la fecha de publicación del Alcuerdu de Personal Docente Interín 2021 qu’antes del 31 d’avientu del añu 2023 cumplieren 55 años y cunten nesa fecha con más de venti años de serviciu, de los cualos siquier los diez últimos años alegaos sían en centros públicos de la Rexón de Murcia, van figurar nel llugar más altu que correspuenda pola so puntuación, sumándo-yos la meyor nota d’oposición ya integrándolos nel Bloque I. En Galicia, les llistes “conxélense” transitoriamente col personal que yá forma parte d’elles: quien participen nel concursu oposición d’estabilización nun van aportar a les llistes d’interinidá, namá mientres esti procesu estraordinariu.

Inda en borrador, l’alministración canaria propón la continuidá nes llistes hasta’l cursu 2025/2026, fecha en que, según el Gobiernu, tamién remata’l plazu pa que’l funcionariáu de carrera ensin titulación universitaria, del Cuerpu de Profesoráu de FP pueda aportar al Cuerpu de Secundaria, evitando asina la diferencia de tratu ente’l personal funcionario ya interín, n’aplicación de la directiva europea 1999/70/CE relativa al Alcuerdu Marcu de la CES, la UNICE y el CEEP sobre trabayu de duración determinada. Na mesma llinia, Castiella La Mancha, va caltener a los/les sos trabayadores nes llistes de la so especialidá, col mesmu baremu nel que s’atopen anguaño, hasta la finalización del procesu d’integración.
Madrid nun dexa actualizar el baremu, pero dexa caltenese nes llistes d’interinidá: los aspirantes que, a 30 de xunu del cursu escolar en que se realice’l procesu selectivu, pertenezan a la llista ordinaria d’interinidá d’una especialidá, nun causaren baxa definitiva de la mesma, y deseyen siguir formando parte de la llista ordinaria de la especialidá van poder:
1. Siguir formando parte de la llista ordinaria d’aspirantes a desenvolver puestos docentes en réxime d’interinidá nuna determinada especialidá, ensin necesidá de presentar solicitú nin presentase a la última convocatoria d’oposición, siempres que se presentaren a una de les postreres 5 convocatories de procedimientos selectivos de dicha especialidá, realizaes pola Comunidá de Madrid dientro de los diez años anteriores a la formación de la llista correspondiente. Nesti casu, el baremu al que se fai alusión nel artículu 10 d’esti Alcuerdu va calculase colos méritos acreditaos nel últimu procesu selectivu de la especialidá al que se presentara l’aspirante, ensin que’l candidatu pueda apurrir nueva documentación.

Como dicíamos, inclusive’l Ministeriu d’Educación tien una propuesta sobre la Mesa de negociación qu’implica, como nun podía ser d’otra manera, un cambéu de la orde que regula la formación de llistes d’aspirantes a desempeñar en réxime d’interinidá: “quien a la finalización del cursu 2022/2023 formen parte de les llistes d’aspirantes a ocupar puestos en réxime d’interinidá naquelles especialidaes del cuerpu, a escastar, de profesores técnicos de formación profesional que fueron integraes nel cuerpu de profesores d’enseñanza secundaria, naquellos supuestos nos nun puedan presentase a los procedimientos selectivos d’esa especialidá que sían convocaos nel cuerpu de profesores d’enseñanza secundaria por nun cumplir los requisitos de titulación esixíos, siempres que se-yos asignara númberu de rexistru de personal y acrediten una esperiencia docente de, siquier, dos cursos académicos como personal funcionario interino nesa especialidá na correspondiente Ciudá Autónoma de que les sos llistes forme parte, van poder permanecer neses llistes.

Sicasí, n’Asturies, la nuesa Conseyería d’Educación nun fue pa proponer cambéu dalgunu más allá d’una adaptación transitoria de los coeficientes multiplicadores de dellos apartaos del baremu recoyíu nel Anexu del Alcuerdu d’interinidá vixente dende 2014. Y nun ye porque SUATEA nun lo tenga esixío.

El 3 de payares de 2022, la primera vez, na xunta ente la Dirección Xeneral de Personal Docente y los sindicatos p’analizar la propuesta de la Conseyería sol Decretu d’integración del Profesoráu Técnicu de FP al cuerpu de Profesores de Secundaria. Entós daquella, la responsable de personal, Eva Ledo, comprometióse intentar axustar a nivel estatal una prórroga pa qu’estos y estes trabayadores pudieren siguir n’activu. Ye importante soliniar qu’uemplegó’l términu “intentar”; esperanzador pero poco garantista.

El 14 d’avientu, na xunta sobre la convocatoria del concursu oposición d’estabilización, volvimos aportunar na busca d’una solución, teniendo en cuenta qu’esi personal nun puede presentase a los procesos de estabilización.

El pasáu 9 de febreru, na Mesa de negociación pal cambéu del Alcuerdu d’Interinidá cuando SUATEA foi la única organización sindical ellí convocada que se negó a soscribir la propuesta porque, ente otros motivos, nun aceptó axustase la que pa SUATEA yera la solución más rápida pa evitar el cese definitivu ya inminente del profesoráu interín técnicu de FP: esaniciar la obligatoriedá de presentase a les oposiciones. Díxosenos que nun convenía andar modificando más condiciones con tan pocu tiempu pal entamu de los procesos selectivos, cuando nel añu 2014, el nuevu alcuerdu, qu’introducía como novedá la obligatoriedá de presentase a oposiciones, entró en valor en mayu y sí, aquel añu tamién hubo oposiciones.

Dende SUATEA esiximos a esta Conseyería d’Educación y al Gobiernu d’Asturies que se dexe de sides y trate con dignidá a les/los sos trabayadores temporales ya interines (dalgunes, como nesti casu, con más de 30 años de docencia al llombu, méritu que decidieron refugar d’un refundiu) estabilizando a estes persones hasta la so xubilación, porque ye la única solución decente.
El Secretariáu de SUATEA
N’Uviéu a 23 de marzu de 2023