Arguyu 2024

Esta entrada está disponible en: Castellano (Castellanu)

La celebración del 28 de xunu, aniversariu de la revuelta de Stonewell en 1969 y Día Internacional de la comunidá LGTBI, coincide esti añu con un ascensu de grupos d’ultraderecha a nivel internacional al tiempu que medren los discursos militaristes que busquen normalizar aspectos referíos a la guerra na nuestra sociedá.

Si hai daqué que nos defíne como grupu social a la comunidá lgtbi ye la nuestra oposición a la guerra, al militarismu y al fascismu.  Toos estos referentes ideolóxicos afiten siempre valores venceyaos a la xerarquía, la disciplina, la misoxinia y el machismu, y busquen una homoxeneidá social que namás puede surdir tapeciendo les voces y los comportamientos minoritarios entendíos como disidencia. Nun ye casualidá que depués d’un añu de presencia nes instituciones, los cargos políticos de Vox busquen callanos poniendo en marcha polítiques de censura a la hora publicar llibros o actividaes que dean visibilidá al colectivu lgtbi o intenten tapecer los nuestros símbolos d’identidá política como ye la bandera del arcu la vieya.

Pero estos aspectos nun van poder impedir que, una vez más, salgamos a la cai a amosar la nuestra visibilidá, a reivindicar la defensa de los nuestros derechos amenazaos pola ultraderecha y a reclamar con arguyu la defensa de los nuestros derechos como colectivu. Y vamos facer como venimos faciendo dende va décades, vamos manifestanos combinando la nuesa alegría pa tomar les cais con otros sectores sociales que se xunten a la nuestra llucha y, d’esa manera, denunciar que vien una fola de misoxinia, de machismu, de racismu y lgtbifobia coles que pretenden devolvenos a un armariu del que va munchos años que salimos pa nun volver.

Decidimos normalizar la nuestra presencia en tolos sectores de la nuestra sociedá y nun vamos recular nel exerciciu de los nuestros derechos. Nuna situación como l’actual, tenemos que pidir, a los nuestros gobernantes, polítiques decidíes que garanticen el respetu y el derechu a amosanos abiertamente, dende’l puestu de trabayu hasta cualquier rincón social. Esi respetu pasa por una correcta información, llibre de prexuicios, a quien güei ta dientro del sistema escolar. Solo una mocedá con una correcta información garantiza que les polítiques de xéneru, d’igualdá y respetu a la diversidá en cualesquier de les sos formes, puedan cumplir los sos oxetivos pa desaniciar la discriminación y el riesgu d’esclusión que tovía esiste en dalgunos sectores de la nuestra sociedá, especialmente contra’l colectivu transexual.

La comunidá LGTBI formamos parte d’un bloque social progresista que s’esmolez pola meyora de les llibertaes democrátiques y la llucha en contra de les desigualdaes sociales. Nesi sentíu, movilizámonos colectivamente pa denunciar les propuestes discriminatories, les polítiques de retayos de derechos, los discursos d’odiu en contra de cualquier grupu social.

Frente a la política neolliberal que nos atomiza como individuos y estrémanos socialmente, defendemos la visibilidá y la participación en lluches colectives que supongan una meyora pa la xusticia, la igualdá y el respetu a la diversidá.

Frente al ascensu del militarismu y la guerra, vamos siguir denunciando les xerarquíes, impulsando la insumisión contra les polítiques que nun defenden los nuestros intereses. La guerra nun puede ser un negociu que se xustifica a cuenta de les nuestres vides. Y dicimos altu y claro que nun hai Arguyu na ocupación militar d’otros países, na colonización de territorios ayenos  nin nes guerres porque son valores colos que nun podemos identificanos.

Viva l’Arguyu multicolor.
Frente al machismu y los prexuicios: educación laica.
Paz, respetu y llibertá

 Arguyu LGTBI 2024 |
SUATEA/Confederación Intersindical

Print Friendly, PDF & Email

Esta entrada está disponible en: Castellano (Castellanu)