5 d’ochobre Día Mundial de los y les docentes

       

EN MEDIU D’UNA PANDEMIA GLOBAL, LA SALÚ Y LA ESTABILIDÁ NEL EMPLÉU VUÉLVENSE LES PRINCIPALES DEMANDES DEL PROFESORÁU

Dende’l 1994, el Día Mundial de los y les Docentes conmemora l’aniversariu de la soscripción de la Recomendación de la OIT y la UNESCO relativa a la Situación del Personal Docente (1966).

Esti añu, la celebración llega envuelta nuna una situación especialmente complexa pa tol planeta. La crisis sanitaria causada pol coronavirus provocó una alteración drástica de costumes, derechos y garantíes tanto personales como coleutives, a la vez que ta teniendo unos efeutos económicos que ponen en pelligru bienes tan esenciales como son la salú y la educación de miles de millones de persones.

A lo llargo d’esti añu 2020, prácticamente la totalidá de la enseñanza que s’imparte en tol mundu, interrumpió la presencialidá de la educación, pa vese obligada a esplorar nueves formes d’aprendizaxe, per aciu de la enseñanza a distancia apoyada n’aparatos tecnolóxicos. Inclusive, nel momentu actual, cerca de 700 millones d’estudiantes nun recuperaron la enseñanza presencial, lo que conlleva graves consecuencies como l’aumentu de desigualdaes y, polo tanto, de la fienda social.

Per otru llau, los países que recuperaron l’actividá llectiva presencial tuvieron qu’implantar midíes p’asegurar la salú de tola comunidá educativa, o lo que ye lo mesmo, de tola sociedá, porque’l contaxu que provoca’l virus no se llenda a sectores concretos. Sicasí, en dellos países, eses midíes nun fuerono les más afayaes. N’España, con la escición de dalguna Comunidá Autónoma, tampoco. La llista de midíes que se debíen haber aplicao y nun se fizo, ye llarga: nun se mermó la ratio, nun se contrató’l profesoráu necesario, na mayoría de Comunidaes Autónomes nun se ficieron pruebes PCR a los miembros de la comunidá educativa, nun se ta protexendo al profesoráu especialmente vulnerable, los centros educativos nun disponen de personal con conocimientos sanitarios,… ente un llargu etcétera.

N’esta situación, na que la dotación económica que’l Gobiernu d’España punxo a disposición de les Comunidaes Autónomes pa educación, ye inferior a les ayudes económiques prestaes a sectores como l’automovilísticu o’l del turismu, la salú del docente nun ta asegurada. Comprobémoslo nes primeres selmanes de clase nes que’l númberu de profesores infectaos nes aules cuéntase per cientos.

La situación llaboral nunye muncho meyor. Los contratos que se tán faciendo al profesoráu son, en munchos casos, d’una duración llendada, afondando nun problema yá endémicu n’Alministración del nuestru país: la precariedá nel empléu. Si, nel añu pasáu, la tasa d’interinidá na educación, sobrepasaba’l 20%, depués de la llegada de la pandemia -al suspendese la realización de la convocatoria d’oposiciones- actualmente afeuta a un terciu del conxuntu del profesoráu de la enseñanza pública a nivel estatal.

Delles sentencias del Tribunal de Xusticia de la Unión Europea señalen que l’Estáu Español vien cometiendo fraude llei y vien abusando na contratación del personal interino que concatenó contratos durante más de tres años, porque,“sobre la base d’una rellación de serviciu de duración determinada”, estes persones “desempeñaron de forma constante y continuada les mesmes funciones, cuando’l mantenimientu de manera permanente de dichu empleáu públicu nesa plaza vacante se debe al incumplimientu per parte del empleador de la so obligación llegal d’organizar nel plazu previstu nun procesu selectivu con oxetu de proveer definitivamente la mentada plaza vacante”, como diz testualmente la última d’eses sentencies, con fecha 19 de marzu d’esti mesmu añu. Sicasí, actualmente cerca de 170.000 docentes nel sistema educativu non universitariu del nuestru estáu, tán en situación d’interinidá.

Too ello, ensin olvidar enxamás otru fechu constatáu que ye la feminización de la enseñanza: el 66,5% de tolos puestos docentes ta ocupáu por muyeres, dende un ablucante 96,7% n’educación infantil, hasta el 41,3% nes Universidades. Y nun ye una situación qu’ocurra esclusivamente n’España. Na mayoría los países asocede lo mesmo. Mientres que, a la vez, les funciones directives les desndolquen los homes na mayor parte los casos, de mou medrante, cuanto más arriba ta la etapa educativa.

Polo tanto, si la pandemia desbordó la situación llaboral del personal docente, nun escaezamos que lo fizo, na so mayoría, sobre les muyeres: más trabayu, más problemes de conciliación y menos proteición.

Urxe una solución,porque mientres esta nun se dea, toles declaraciones polítiques de respetu y ensalzamientu hacia la figura del docente, nun van dexar de ser pallabres vacíes, que nun se traducen en fechos. Como lo son, les qu’escuchamos estos díes per parte de responsables ministeriales y de las conseyeríes autonómiques, mientres dexen al profesoráu espuestu en mediu d’una pandemia ensin comparanza nel últimu sieglu.

Secretariáu de STEs y la Organización de Muyeres de la Confederación Intersindical

                                                                                        5 d’ochobre de 2020